स्पेनिस क्लब रियल म्याड्रिडका कप्तान सर्जियो रामोसले क्लबका लागि सय गोल पूरा गरेका छन्।
युरोपियन च्याम्पियन्स लिग अन्तर्गत मंगलबार राति इटालियन क्लब इन्टर मिलानविरुद्ध गोल गरेसँगै डिफेन्डर रामोसले क्लबका लागि सय गोल पूरा गरेका हुन्। खेलमा रियल म्याड्रिड ३-२ गोलले विजयी भयो।
उनले हेडमार्फत गोल गरेका थिए। उनले क्लबका लागि हेडमार्फत गरेको यो ५५औं गोल हो। उनले २१ गोल पेनाल्टीमार्फत गरेका छन्। २४ गोल उनले खुट्टाले गरेका छन्। जसमा २ गोल फ्रिकिकबाट भएका छन्।
क्लबका लागि सय गोल पूरा गर्ने कीर्तिमान बनाएपछि रामोसले अझै गोल गर्ने विश्वास व्यक्त गरेका छन्।
'व्यक्तिगत रेकर्ड मेरो प्राथमिकतामा हुने गरेको छैन। मैले टिमलाई जिताउनका लागि खेल्ने गरेको छु। आगामी दिनमा पनि टिमलाई जिताउन गोल गर्ने प्रयास गर्नेछु,' ३४ वर्षीय रामोसले भने।
उनले ११ सिजन च्याम्पियन्स लिगमा गोल गर्ने क्रममा अहिलेसम्म १४ गोल गरेका छन्।
उनले ला लिगामा ७४ गोल गरेका छन्। जसमा रियलबाट ७० गोल र सेभियाबाट २ गोल समावेश छन्। उनले स्पेनिस कपमा सात गोल गर्दा बाँकी गोल अन्य प्रतिस्पर्धा गरेका छन्।
उनले रियलका लागि ६५९ खेल खल्दा अहिलेसम्म २२ ट्रफी उचालिसकेका छन्।
स्पेनिस राष्ट्रिय टिममा पनि रामोसको योगदान महत्वपूर्ण छ।
उनले स्पेनका लागि अहिलेसम्म २३ गोल गरेका छन्। रियलबाट सय र सेभियाबाट तीन गरी रामोसले अहिलेसम्म करिअरमा १२६ गोल गरेका छन्। जसका कारण उनले बढी गोल गर्ने डिफेन्डरको कीर्तिमान बनाएका थिए।
उनी ला लिगाको इतिहासमा बढी गोल गर्ने डिफेन्डर हुन्। गत जुनमा उनले ला लिगामा ६७औं गोल गरेसँगै रोनाल्ड कोम्यानको रेकर्ड भंग गरेका थिए।
रामोस रियलका लागि सय गोल पूरा गर्ने २१औं खेलाडी बने।
रामोसले सन् २०१४ र २०१६ को च्याम्पियन्स लिगको उपाधि रियलले जित्दा फाइनलमा महत्वपूर्ण गोल गरेका थिए।
उनले चिरपरिचित स्पेनिस प्रतिद्वन्द्वी बार्सिलोनाविरुद्ध पाँच गोल गरेका छन्।
