स्पेनिस ला लिगामा बार्सिलोनाले पछिल्ला पाँच खेलमा पहिलो जित निकालेको छ।
बार्सिलोनाले शनिबार राति भएको खेलमा रियल बेटिसलाई ५-२ गोलले पराजित गरेको हो।
यसअघि बार्सिलोना पछिल्ला चार खेल मध्ये दुई खेलमा बराबरी र दुई खेलमा पराजित भएको थियो।
शनिबार बार्सिलोनाका लागि उस्मान डेम्बेलेले खेलको २२ मिनेटमा पहिलो गोल गरे। तर बेटिसका सनाब्रियाले पहिलो हाफको इन्जुरी टाइममा बराबरी गोल फर्काए।
दोस्रो हाफ सुरु भएपछि अग्रता लिने क्रममा बार्सिलोनाका एन्टोनी ग्रिजम्यानले खेलको ४९ मिनेटमा दोस्रो गोल गरे।
बेटिस ६० मिनेटमा १० खेलाडीमा सीमित बन्यो। मेन्डीलाई रेफ्रीले रातो कार्ड देखाउँदै मैदान बाहिर पठाए।
बार्सिलोनाका लागि लिओनल मेसीले ६१ मिनेटमा तेस्रो गोल गरे। बेटिसका मोरोनाले ७३ मिनेटमा अर्को गोल गर्दा खेल ३-२ को अवस्थामा पुग्यो।
मेसीले ८२ मिनेट र गोन्जालेजले ९० मिनेटमा थप गोल गरेपछि बार्सिलोना विजयी भयो।
लिगको अर्को खेलमा एट्लेटिको म्याड्रिडले काडिजलाई ४-० गोलले पराजित गरेको छ।
जितसँगै एट्लेटिको ७ खेलबाट १७ अंक जोड्दै अंक तालिकाको शीर्ष स्थानमा पुगेको छ। बार्सिलोना ७ खेलबाट ११ अंक जोडेर आठौं स्थानमा छ।