फिफा विश्वकप २०२२ कतार अन्तर्गत दक्षिण अमेरिकी छनोटअन्तर्गत आफ्नो तेस्रो खेलमा अर्जेन्टिना बराबरीमा रोकिएको छ।
अर्जेन्टिनालाई शुक्रबार भएको खेलमा पाराग्वेले १-१ गोलको बराबरीमा रोकेको हो।
खेलको २१ मिनेटमा पाराग्वेल अग्रता लिएको थियो। पाराग्वेका लागि रोमेरोले २१ मिनेटमा पेनाल्टीमा गोल गरे। अर्जेन्टिनाका खेलाडीले पेनाल्टी एरियामा पाराग्वेका मार्टिनेजलाई लडाएपछि रेफ्रीले पेनाल्टी दिने निर्णाय गरेका थिए।
अर्जेन्टिनाले खेलको ४१ मिनेटमा बराबरी गोल फर्कायो। अर्जेन्टिनाका लागि कर्नर बलमा निकोलास गोन्जालेजले हेडमार्फत बराबरी गोल गरेका थिए।
पहिलो हाफ १-१ गोलको बराबरीमा सकिएको खेलमा अर्जेन्टिनाका कप्तान लिओनल मेसीले ५८ मिनेटमा बललाई जाली चुमाएका थिए। तर भिएआरमार्फत रिप्ले हेरेपछि सो गोलले मान्यता पाएन। मेसीले गोल गरे पनि अर्जेन्टिनाका मिडफिल्डरले फल गरेको देखिएको थियो।
यसअघिका दुई खेलमा जित हात पारेको अर्जेन्टिना अंक तालिकामा शीर्ष स्थानमा छ। अर्जेन्टिनाले ३ खेलबाट ७ अंक जोडेको छ।
एक खेल कम खेलेको दोस्रो स्थानको ब्राजिलको ६ अंक छ भने तेस्रो स्थानमा रहेको इक्वेइडरको पनि ६ अंक छ।
इक्वेइरलरे आजै भएको खेलमा बोलिभियालाई ३-२ ले हरायो।
छनोट अन्तर्गत शनिबार विहान ब्राजिल र भेनेजुएला, चिली र पेरु तथा कोलम्बिया र उरुग्वेबीच खेल हुनेछ।