स्पेनिस क्लब बार्सिलोना युरोपियन च्याम्पियन्स लिगको अन्तिम १६ मा प्रवेश गरेको छ।
मंगलबार राति भएको समूह 'जी' को खेलमा युक्रेनको डाइनामो किभमाथि ४-० को जित निकाल्दै बार्सिलोनाले अन्तिम १६ मा स्थान पक्का गरेको हो।
बार्सिलोनाको जितमा सर्जिनो डेस्टले ५२ मिनेटमा पहिलो गोल गरे। ब्रेथवेटले ५७ र ७० मिनेटमा गरी दुई गोल गरे। उनले दोस्रो गोल पेनाल्टीमार्फत गरेका थिए।
एन्टोनी ग्रिजम्यानले दोस्रो हाफको इन्जुरी टाइममा बार्सिलोनाका लागि चौथो गोल गरेका थिए।
यहि समूहको अर्को खेलमा इटालियन क्लब युभेन्ट्सले हंगेरियन क्लब फेरेनक्वेरोसी टीसीलाई २-१ गोलले पराजित गरेर अन्तिम १६ मा स्थान पक्का गरेको छ।
खेलमा फेरेनक्वेरोसीले १९ मिनेटमा उजुनीको गोलबाट अग्रता लिएको थियो। ३५ मिनेटमा युभेन्ट्सका लागि क्रिस्टियानो रोनाल्डोले बराबरी गोल फर्काउन सफल भए।
दोस्रो हाफको इन्जुरी टाइममा अल्भारो मोराटाले गोल गरेपछि युभेन्ट्सले रोमाञ्जक जित हात पार्यो।
समूहमा लगातार चार जित हात पारेको शीर्ष स्थानको बार्सिलोनाको १२ अंक छ। दोस्रो स्थानको युभेन्ट्स ९ अंक छ। तेस्रो स्थानको डाइनाभो र चौथो स्थानको फेरेनक्वेरोसीले १-१ अंक मात्र जोड्न सकेका छन्।
यता समूह 'ई' बाट इंग्लिस क्लब चेल्सी र स्पेनिस क्लब सेभियाले अन्तिम १६ मा स्थान बनाएका छन्। मंगलबार भएको खेलमा चेल्सीले फ्रेन्च क्लब रेनेसलाई २-१ गोलले पराजित गर्यो।
चेल्सीको जितमा हुडसन ओडोइनले २२ मिनेटमा पहिलो गोल गर्दा ओलिभर जिरुडले दोस्रो हाफको इन्जुरी टाइममा विजयी गोल गरे। त्यसअघि रेनेसका गुइरासीले ८५ मिनेटमा बराबरी गोल फर्काएका थिए।
सेभियाले पनि रसियन क्लब एफके क्रास्नोदरलाई २-१ गोलले नै पराजित गर्यो।
सेभियाले खेलको चौथो मिनेटमा राकिटिकको गोलबाट अग्रता लियो। साउसा काम्पोले ५६ मिनेटमा बराबरी गोल फर्काए। तर सेभियाका एल हडाडीले दोस्रो हाफको इन्जुरी टाइममा गोल गरेर आफ्नो टिममलाई रोमाञ्चक जित दिलाए।
समूहमा शीर्ष स्थानको चेल्सी र दोस्रो स्थानको सेभियाको समान १०-१० अंक छ। तेस्रो स्थानको क्रास्नोदर र चौथो स्थानको रेनेसले १-१ अंक मात्र जोड्न सकेका छन्।
