युरोपियन च्याम्पियन्स लिगअन्तर्गत समूह 'बी' को खेलमा स्पेनिस क्लब रियल म्याड्रिडले इटालियन क्लब इन्टर मिलानलाई पराजित गरेको छ।
बुधबार राति भएको खेलमा रियलले २-० को जित हात पारेको हो। रियलको जितमा इडिन हजार्डले सातौं मिनेटमा पेनाल्टीमा पहिलो गोल गरे। इन्टरका हाकिमीले ५९ मिनेटमा आत्मघाती गोल गर्दा रियलको अग्रता दोब्बर भएको थियो।
खेलको ३३ मिनेटमा इन्टर १० खेलाडीमा सीमित बनेको थियो। इन्टरका अर्टुरो भिदाल दोस्रो पहेँलो कार्ड पाउँदै मैदान छाड्न बाध्य भएका थिए।
यो समूहको अर्को खेलमा जर्मन क्लब बोरुसिया मुन्छेनग्लाडबाखले शख्तर डोनेट्स्कलाई ४-० गोलले पराजित गरेको छ।
समूहमा मुन्छेनग्लाडबाख ८ अंक जोडेर शीर्ष स्थानमा छ। दोस्रो स्थानको रियलको ७ अंक छ भने शख्तर ४ अंक जोडेर तेस्रो स्थानमा रहेको छ। पुछारको इन्टरको २ अंक मात्र छ।
यता समूह 'ए' को खेलमा स्पेनिस क्लब एट्लेटिको म्याड्रिड र लोकोमोटिभ मस्कोले गोलरहित बराबरी खेलेर अंक बाडेका छन्।
साविक विजेता वायर्न म्युनिख भने अस्ट्रियन क्लब साल्जबर्गलाई ३-१ गोलले पराजित गरेर अन्तिम १६ मा पुगेको छ।
समूह 'ए' मा शीर्ष स्थानको वायर्नले चार खेलमा लगातार जित निकाल्दै १२ अंक जोडेको छ। दोस्रो स्थानको एट्लेटिकको ५ अंक छ भने मस्को ३ अंक जोडेर तेस्रो स्थानमा छ। चौथो स्थानको साल्जबर्गले १ अंक जोडेको छ।
