युरोपियन च्याम्पियन्स लिगमा स्पेनिस महारथी बार्सिलोना र इटालियन च्याम्पियन युभेन्ट्सले सहज जित हात पारेका छन्।
समूह 'जी' को खेलमा युभेन्ट्सले डाइनामो किभ र बार्सिलोनाले फेरेनक्वेरोसी टीसीलाई समान ३-० गोलले पराजित गरेका हुन्। दुवै टिम यसअघि नै अन्तिम १६ मा पुगिसकेका छन्।
युभेन्ट्सले घरेलु मैदानमा भएको खेलमा डाइनामो किभमाथि पहिलो हाफमा १ गोल गरेको थियो। युभेन्ट्सका लागि खेलको २१ मिनेटमा फेडेरिको चिएसाले पहिलो गोल गरे।
५७ मिनेटमा क्रिस्टियानो रोनाल्डोले युभेन्ट्सको अग्रता दोब्बर पारे। उनले मोराटाको पासमा गोल गरेका थिए।
यो रोनाल्डोको करिअरको ७५०औं गोल हो। उनले स्पेनिस क्लब रियल म्याड्रिडका लागि ४५०, इंग्लिस क्लब म्यानचेस्टर युनाइटेडबाट ११८, पोर्चुगलबाट १०२, युभेन्ट्सबाट ७५ र स्पोर्टिङ लिस्बनबाट ५ गोल गरेका छन्।
मोराटाले ६६ मिनेटमा टिमका लागि तेस्रो गोल गरे। मोराटालाई भने चिएसाले पास दिएका थिए।
यता बार्सिलोनोले भने पहिलो हाफमै तीन गोल गर्यो। बार्सिलोनाका लागि ग्रिजम्यानले १४ मिनेटमा पहिलो गोल गरे। ब्रेथवेटे २० मिनेटमा दोस्रो तथा डेम्बेलेले २८ मिनेटमा पेनाल्टीबाट तेस्रो गोल गर्न सफल भए।
समूहमा बार्सिलोना ५ खेलबाट १५ अंक जोड्दै शीर्ष स्थानमा छ। दोस्रो स्थानको युभेन्ट्सले १२ अंक जोडेको छ। डाइनामो र फेरेनक्वेरोसीले १-१ अंक मात्र जोड्न सकेका छन्।
यता समूह 'एफ' को खेलमा जर्मन क्लब बोरुसिया डर्टमुन्ड र इटालियन क्लब लाजियोले १-१ गोलको बराबरी खेलेका छन्। समूहको अर्को खेलमा क्लब ब्रुगले सेन्ट पिटर्सवर्गलाई ३-० गोलले पराजित गरेको छ।
समूहमा डर्टमुन्ड १० अंकसहित शीर्ष स्थानमा छ। दोस्रो स्थानको लाजियोको ९ अंक छ भने तेस्रो स्थानको ब्रुगको ७ अंक छ। १ अंक जोडेको पिटर्सवर्ग भने बाहिरिएको छ।