'इटालियन सिरि ए' मा शीर्ष स्थानको एसी मिलानले चार अंकको अग्रता लिएको छ।
शनिबार राति भएको खेलमा टोरिनोलाई २-० गोलले पराजित गर्दै मिलानले चार अंकको अग्रता बनाएको हो।
मिलानका लागि खेलको २५ मिनेटमा राफायल लिआयोले पहलो गोल गरे। उनले ब्रहिम डियाजको पासमा गोल गरेका थिए।
३६ मिनेटमा मिलानले पेनाल्टी पायो। भिएआर रिभ्यूमार्फत दिएको पेनाल्टीमा फ्रान्क केसिएले गोल गरे। मिलानका डियाजलाई टोरिनोका कप्तान बेलोटीले फल गरेपछि भिएआर रिभ्यू हेरिएको थियो।
लिगका अन्य खेलमा एटलान्टाले बेनेभेन्टोलाई ४-१ गोल र जिनोआले बोलोग्नालाई २-१ गोलले पराजित गरेका छन्।
शीर्ष स्थानको एसी मिलानले १७ खेलबाट ४० अंक जोडेको छ।
दोस्रो स्थानको इन्टर मिलानको १६ खेलबाट ३६ अंक र तेस्रो स्थानको रोमाको १६ खेलबाट ३३ अंक छ।
एटलान्टा १६ खेलबाट ३१ अंक जोडेर चौथो र युभेन्ट्स १५ खेलबाट ३० अंक जोड्दै पाँचौ स्थानमा रहेका छन्।
