राष्ट्रिय महिला लिग फुटबल बुधबारदेखि सुरू हुँदैछ। लिगको उद्घाटन खेलमा त्रिभुवन आर्मी क्लब र नेपाल पुलिस क्लब दशरथ रंगशालामा भिड्दैछन्।
पहिलोपटक डबल राउण्ड रोबिनको आधारमा आयोजना हुन लागेको महिला लिगमा सात टोली सहभागी छन्। जसमा तीन विभागीय टिम र चार स्थानीय तहका टिम प्रतिस्पर्धामा उत्रनेछन्।
नेपाल एपीएफ क्लब, नेपाल पुलिस क्लब, त्रिभुवन आर्मी फुटबल क्लब, चौदण्डीगढी नगरपालिका, वालिङ नगरपालिका, चन्द्रपुर नगरपालिका र विराटनगर महानगरपालिकाले उपाधिका लागि प्रतिस्पर्धा गर्नेछन्।
अखिल नेपाल फुटबल संघ (एन्फा) ले महिला लिगमा पहिलो पटक विदेशी खेलाडी आबद्ध गर्न पाइने नियम बनाएपछि विराटनगरले चार जना विदेशी खेलाडी भित्र्याएको छ।
चारै जना भारतीय खेलाडी हुन्। जसमा तीन जना झारखण्डका हुन् भने एक जना सिक्किमकी हुन्।
चारै जनासँग भारतको महिला लिग खेलेको अनुभव रहेको विराटनगरका प्रशिक्षक पारस चौधरीले सेतोपाटीलाई बताए।
भारतका खेलाडी माघ तीन गते नेपाल आएको र चार गतेदेखि विराटनगरको प्रशिक्षणमा सामेल भएको प्रशिक्षक चौधरीको भनाइ छ।
वालिङले पनि क्यामरुनका चार खेलाडी आबद्ध गर्ने प्रक्रिया अन्तिम चरणमा पुर्याएको छ। लिगका लागि चार जना क्यामरुनका खेलाडी सम्पर्कमा रहेको वालिङका मेयर दिलीप प्रताप खाँणले सेतोपाटीलाई जानकारी दिए।
क्यामरुनका खेलाडी नेपालमा आएपछि क्वारेन्टिनमा बस्नु पर्ने वा नपर्ने विषयको पक्का हुन बाँकी रहेको मेयर खाँणले बताए।
'पिसिआर टेस्ट गरेर खेल्न पाइने भए मात्र उनीहरू क्यामरुनबाट नेपाल आउँछन्। क्वारेन्टिनमा बस्नु पर्ने भए आउँदैनन्। किनभने नेपाल आएर क्वारेन्टिनमा बसुन्जेल लिग सकिने अवस्था छ,' खाँडले भने।
वालिङले क्यामरुनी खेलाडी भित्र्याएको अवस्थामा एक खेलाडीलाई ४० हजार रुपैयाँ दिनेछ। यस्तै उनीहरूको आतेजाते हवाइ टिकट, खाने र बस्ने व्यवस्था गरिदिनेछ।
लिगका लागि विभागीय टिमले विदेशी खेलाडी भित्र्याउने छैनन् भने उदयपुरको चौदण्डीगढी र रौतहटको चन्द्रपुरले पनि विदेशी खेलाडी आबद्ध नगर्ने भएका छन्।
लिगको उद्घाटन खेलमा दर्शकलाई निःशुल्क प्रवेशको व्यवस्था गरिएको एन्फा प्रवक्ता किरण राईले जानकारी दिए। उद्घाटनपछिका खेल भने एन्फा मैदान सातदोबाटोमा हुनेछन्।
एन्फा कोरोनाकै कारण गत वर्ष महिला लिगको आयोजना गर्न पाएको थिएन। प्रतियोगिताको विजेताले रु १० लाख, दोस्रोले रु आठ लाख, तेस्रोले रु पाँच लाख तथा चौथो हुनेले रु तीन लाख प्राप्त गर्ने एन्फाले जनाएको छ। प्रतियोगिताको सर्वोत्कृष्ट खेलाडीले एक थान स्कुटर तथा विधागत उत्कृष्ट खेलाडीले जनही रु ५० हजार पुरस्कार प्राप्त गर्नेछन्।
