स्पेनिस ला लिगाको साविक विजेता रियल म्याड्रिडले बराबरी खेलेको छ।
सोमबार राति भएको खेलमा रियल र रियल सोसिडाडले १-१ गोलको बराबरी खेल्दै अंक बाडेका हुन्।
खेलको पहिलो हाफ गोलरहित बराबरीमा सकियो। ५५ मिनेटमा सोसिडाडले खेलमा अग्रता लियो।
मान्जानेराले गोल गर्दै सोसिडाडलाई अग्रता दिलाए। उनलाई गोल गर्न मोनरियलले पास दिए।
खेल सकिन एक मिनेट बाँकी छदा रियलले बराबरी गोल फर्काउन सफल भयो। रियलका लागि ८९ मिनेटमा भिनिसियस जुनियरले गोल गरे। उनलाई गोल गर्न भाज्क्युले पास दिएका थिए।
बराबरीसँगै रियलले बार्सिलोनालाई पछि पारेर दोस्रो स्थानमा उक्लने मौका गुमाएको छ।
अंक तालिकाको तेस्रो स्थानमा रहेको रियलको २५ खेलबाट ५३ अंक छ। दोस्रो स्थानको बार्सिलोनाको पनि समान खेलबाट ५३ अंक नै छ।
शीर्ष स्थानको एट्लेटिको म्याड्रिडको २४ खेलबाट ५८ अंक रहेको छ।
