चर्च ब्वाइज युनाइटेड सहिद स्मारक 'सी' डिभिजन लिगको च्याम्पियन बन्दै 'बी' डिभिजनमा बढुवा भएको छ।
सुपर सिक्सको शीर्ष स्थानमा रहने क्रममा चर्च ब्वाइजले अन्तिम दिन सोमबार झापा युनाइटेडलाई २-१ गोलले पराजित गर्यो।
ब्वाइजको जितमा रेजन माझी र सोम थापाले एक एक गोल गरे। जित हात पारेको अवस्थामा झापा बी डिभिजनमा पुग्ने थियो।
दोस्रो भएको विरगन्ज युनाइटेड क्लब र तेस्रो भएको सामाजिक युवा क्लब पनि 'बी' डिभिजनमा बढुवा भएका छन्।
चर्च ब्वाइज र सामाजिक दुवै क्लब काठमाडौं कोटेश्वरका हुन्।
सामाजिक युवा क्लबले विरगन्ज युथ एकेडेममीलाई १-० ले हराउँदै तेस्रो स्थान पक्का गर्यो। जसले सामाजिकलाई दोस्रो डिभिजनमा पुर्यायो।
विरगन्ज युनाइटेडले खालीबारी युथ क्लबलाई ३-१ गोलले हरायो।
च्याम्पिनय बनेको चर्च ब्याइजले १० लाख रुपैयाँ प्राप्त गर्यो। विरगन्जले ७ लाख र सामाजिकले ४ लाख रुपैयाँ प्राप्त गरे।
विरगन्जका दिलमणी चौधरीले उत्कृष्ट गोलकिपरको अवार्ड जित्दा चर्च ब्वाइजका सनम राई उत्कृष्ट डिफेन्डर घोषित भए। चर्च ब्वाइजकै साइमन लिम्बु उत्कृष्ट मिडफिल्डर र विरगन्जका विवेक चौधरी उत्कृष्ट फरवार्ड भए। सामाजिकका सन्दीप खड्का उत्कृष्ट प्रशिक्षक चुनिए। उत्कृष्ट भएका सबैले २५-२५ हजार रुपैयाँ प्राप्त गरे।
झापाले फेयर प्लेको अवार्ड जित्दै ५० हजार रुपैयाँ प्राप्त गर्यो।