राष्ट्रिय फुटबल टिमका नवनियुक्त प्रशिक्षक अब्दुल्लाह अलमुताइरीले राष्ट्रिय टिमको बन्द प्रशिक्षणका लागि ३२ सदस्यीय टिम घोषणा गरेका छन्।
आगामी जुनमा हुने फिफा विश्वकप २०२२ र एएफसी एसियन कप २०२३ को छनोटको तयारीका लागि प्रारम्भिक टिम घोषणा गरिएको हो।
टिमको प्रशिक्षण नेपाल सुपर लिग (एनएसएल) पछि सञ्चालन हुनेछ।
टिममा अब्दुल्लाहले दक्षिण कोरियामा बस्दै आएका मनिष डाँगी र कतारबाट खेल्दै आएका श्यान्सु भुसाललाई पनि समेटेका छन्।
१९ वर्षीय श्यान्सुले कतारको अल वक्राहको यू-२३ टिमबाट खेल्दै आएका छन्। यो क्लबको सिनियर टिमले कतारको पहिलो डिभिजनको लिग खेल्दै आएको छ। वक्राह यो सिजन आठौं भएको थियो।
यसअघि नेपालको यु-१९ टिमबाट खेलिसकेका मनिषले भने कोरियाको विश्वविद्यालयस्तरीय टिमबाट खेल्ने गर्छन्।
दुवै खेलाडी एनएसएल टिममा पनि आबद्ध भइसकेका छन्। श्यान्सु एफसी चितवनमा आबद्ध छन् भने मनिषलाई विराटनगर सिटी एफसीले भित्र्याएको छ।
नेपाली टिमको बन्द प्रशिक्षण आगामी जेठ ३ देखि सुरू हुनेछ।
नेपाली टिम
गोलकिपर : किरणकुमार लिम्बु (कप्तान), विकेश कुथु, दीप कार्की, विशाल सुनार
डिफेन्डर : रन्जित धिमाल, निशान खड्का, रोहित चन्द, अनन्त तामाङ, दिनेश राजवंशी, अजित भण्डारी, छिरिङ गुरुङ, गौतम श्रेष्ठ, विकास खवास
मिडफिल्डर : त्रिदेव गुरुङ, मनिष डाँगी, तेज तामाङ, एरिक विष्ट, सन्जोक राई, विशाल राई, सुनील बल, रवि पासवान, सेसेहाङ आङदेम्बे, सन्तोष तामाङ, विवेक बस्नेत, प्रकास बुढाथोकी, श्यान्सु भुसाल, अन्जन विष्ट, सुमन लामा
फरवार्ड : दर्शन गुरुङ, अभिषेक रिजाल, भरत खवास, नवयुग श्रेष्ठ
