फ्रेन्च क्लब पिएसजी र इंग्लिस क्लब चेल्सी युरोपियन च्याम्पियन्स लिगको सेमिफाइनलमा प्रवेश गरेका छन्।
मंगलबार राति भएको दोस्रो लेगमा पराजित भएका दुवै टिम पहिलो लेगमा हात पारेको सफलताका कारण अन्तिम चारमा पुगेका हुन्।
मंगलबार भएको दोस्रो लेगमा पिएसजीलाई बार्यन म्युनिखले १-० गोलले हरायो। बार्यनका लागि मोटिङले ४० मिनेटमा गोल गरेका थिए।
घरेलु मैदानमा हारे पनि पिएसजीले पहिलो लेगमा ३-२ को जित हात पारेको थियो। समग्रमा ३-३ को बराबरी भए पनि पिएसजी अवे गोलको आधारमा अन्तिम चारम पुग्न सफल भयो।
जससँगै साविक विजेता बार्यन अन्तिम आठबाटै बाहिरिन बाध्य भयो।
यता घरेलु मैदानमा भएको दोस्रो लेगमा चेल्सी पनि पराजित भयो। चेल्सीलाई पोर्चुगिज क्लब पोर्टोले १-० गोलले पराजित गर्यो।
उसका लागि तारेमीले दोस्रो हाफको इन्जुरी टाइमको तेस्रो मिनेटमा गोल गरेका थिए।
पहिलो लेगमा २-० को जित हात पारेको चेल्सी समग्रमा २-१ ले अघि रहदै अन्तिम चारम पुग्न सफल भयो।
लिगअन्तर्गत आज राति लिभरपुल र रियल म्याड्रिड तथा बोरुसिया डर्टमुन्ड र म्यानचेस्टर सिटीबीच खेल हुनेछ।
पहिलो खेलमा रियलले लिभरपुलाई ३-१ ले हराउँदा सिटीले डर्टमुन्डमाथि २-१ को जित हात पारेको थियो।