नेपाल सुपर लिग (एनएसएल) मा २-० गोलले पछि परेको स्थिति उल्टाउँदै बुटवल लुम्बिनी एफसीले चितवन एफसीसँग बराबरी खेलेको छ।
बुधबार दशरथ रंगशालामा भएको खेलमा बुटवल र चितवनले २-२ गोलको बराबरी खेलेका हुन्।
चितवनले तीन मिनेटभित्र दुई गोल गरेको थियो। खेलको १५ मिनेटमा जर्जप्रिन्स कार्कीले गोल गर्दै चितवनलाई अग्रता दिलाएका थिए।
तीन मिनेटपछि टेकबहादुर बुढाथोकीले चितवनको अग्रता दोब्बर पारे।
३२ मिनेटमा बुटवलका आसिस लामाले डिबक्स बाहिरबाट उत्कृष्ट गोल गर्दा खेल २-१ को अवस्थामा आयो।
पहिलो हाफमा २-१ गोलले पछि परेको बुटवलका लागि लक्ष्मण रुचालले ६५ मिनेटमा बराबरी गोल फर्काएका थिए।
जारी लिगमा चितवनको यो दोस्रो बराबरी हो। यसअघि चितवनले पहिलो खेलमा ललितपुर सिटीसँग १-१ गोलको बराबरी खेलेको थियो।
बुटवलले भने पहिलो खेलमा पोखरालाई हराएको थियो।
बराबरीसँगै बुटवल अंक तालिकाको शीर्ष स्थानमा पुगेको छ। उसको दुई खेलबाट चार अंक भएको छ।
दोस्रो स्थानको विराटनगर सिटी एफसी, तेस्रो स्थानको धनगढी एफसी र चौथो काठमाडौं रेजर्सको समान ३-३ अंक छ।
चितवन भने २ अंकसहित पाँचौ स्थानमा छ।
