नेपाल सुपर लिग (एनएसएल) मा काठमाडौं रेजर्स र पोखरा थन्डर्सले अंक बाडेका छन्। शुक्रबार दशरथ रंगशालामा भएको खेल गोलरहित बराबरीमा सकिएसँगै दुवै टिम अंक बाड्न बाध्य भए।
दोस्रो हाफको इन्जुरी टाइममा पोखराका प्रवीण स्याङतानले हेडमार्फत बललाई जाली चुमाए पनि रेफ्रीले अफसाइड घोषित गरिदिए। उनी केचा यानिङको फ्रिकिङ बलमा हेडमार्फत बललाई जाली चुमाउनुअघि अफसाइड पोजिसनमा थिए।
पोखरा र काठमाडौंको बराबरीसँगै एनएसलको अंक तालिकामा शीर्ष चार टिमको समान अंक भएको छ।
शीर्ष स्थानको बुटवल लुम्बिनी एफसीको २ खेलबाट ४ अंक छ। दोस्रो स्थानको धनगढी एफसीको पनि ३ खेलबाट ४ अंक छ।
तेस्रो स्थानको पोखरा र चौथो स्थानको काठमाडौंको पनि समान ३ खेलबाट ४-४ अंक भएको छ।
पाँचौ स्थानको विराटनगरको २ खेलबाट ३ अंक छ।
छैटौं स्थानको एफसी चितवन र सातौं स्थानको ललितपुर सिटी एफसीको समान २-२ अंक छ।
एनएसएलमा शनिबार दुई खेल हुनेछन्। दिउँस साढे २ बजे हुने खेलमा धनगढी र चितवन तथा अपरान्ह साढे पाँच बजे बुटवल र विराटनगरबीच खेल हुनेछ।