इंग्लिस प्रिमियर लिगअन्तर्गत आइतबार रातिका लागि तय भएको म्यानचेस्टर युनाइटेड र लिभरपुलबीचको खेलमा धेरैको चासो थियो।
म्यानचेस्टरको घरेलु मैदान ओल्डट्राफोर्डमा नेपाली समयअनुसार राति सवा नौं बजेका लागि तय खेल साविक विजेता लिभरपुलले जितेको अवस्थामा लिगको उपाधि विजेताको टुंगो लाग्दै थियो।
लिभरपुल विजयी भएको अवस्थामा म्यानचेस्टर सिटी चार खेल अघि नै लिगको च्याम्पियन बन्थ्यो।
तर म्यानचेस्टर युनाइटेडको र लिभरपुलबीचको खेल निर्धारित समयमा सुरु नै हुन सकेन।
म्यानचेस्टर युनाइटेडका समर्थकले क्लबका मालिक ग्लेजर परिवारविरुद्ध नाराबाजी गर्दै बिरोध प्रदर्शन गरेपछि खेल सुरु गर्न अवरोध पुगेको थियो।
खेलअघि करिब २ सय समर्थकहरू मैदान बाहिर जम्मा भएका थिए। त्यसपछि उनीहरू रंगशाला भित्र गर्दै मैदानसम्म पुगेका थिए।
त्यसक्रममा दुई जना पुलिस अफिसर घाइते भएको लन्डन प्रहरीले जनाएको छ।
युनाइटेडका समर्थकले लामो समयदेखि क्लब व्यवस्थापनको विरोध गर्दै आएका छन्। उनीहरूले क्लब पैसा कमाउन बढी केन्द्रीय भएको आरोप लगाउँदै आएका छन्।
पछिल्लो समय म्यानचेस्टरले युरोपियन सुपर लिग खेल्नका लागि सहमती दिएको विषयमा क्लबका समर्थक असन्तुष्ट छन्। ब्यापक विरोधपछि क्लबले सुपर लिगबाट नाम फिर्ता लिएको थियो।
समर्थकको प्रदर्शनपछि म्यानचेस्टर र लिभरपुलबीचको खेल स्थगित गरियो। प्रिमियर लिगले पुलिस, दुवै क्लब र स्थानीय प्रशासनसँग छलफल गरेपछि खेल स्थगित गरेको जनाएको छ।
समर्थकको विरोध प्रदर्शनका कारण प्रिमियर लिगको खेल स्थगित भएको यो पहिलो घटना हो।
स्थगित भएको खेलको अर्को मिति प्रिमियर लिगले तय गर्न बाँकी छ।
