म्यानचेस्टर सिटीले सिजनको इंग्लिस प्रिमियर लिगको उपाधि जित्न अझै कुर्नु पर्ने भएको छ।
शनिबार चेल्सीसँग २-१ गोलले पराजित भएसँगै सिटीको उपाधि यात्रा लम्बिएको हो।
जित हात पारेको अवस्थामा सिटीले उपाधि जित्ने थियो। अब सिटीले आगामी खेलमा जित हात पारे वा दोस्रो स्थानको म्यानचेस्टर युनाइटेड पराजित भए उपाधि जित्नेछ।
खेलमा अग्रता भने सिटीले लियो। ४४ मिनेटमा रहिम स्टर्लिङले गोल गर्दै सिटीलाई अग्रता दिलाए।
पहिलो हाफको इन्जुरी टाइममा सिटीले अग्रता दोब्बर पार्ने अवसर खेर फाल्यो। सर्जियो अग्युरोले प्राप्त पेनाल्टीमा गोल गर्न सकेनन्। चेल्सीका गिलमरले सिटीका जेससलाई फल गरेपछि पेनाल्टी दिइएको थियो। जसमा अग्युरोको प्रहारलाई चेल्सीका गोलकिपर मेन्डेले विफल पारे।
खेलको ६३ मिनेटमा चेल्सीका जिएचले बराबरी गोल फर्काए। दोस्रो हाफको इन्जुरी टाइमको दोस्रो मिनेटमा अलन्सोले अर्को गोल गर्दा चेल्सीले २-१ गोलको जित हात पार्यो।
यता लिभरपुलले साउथह्याम्टनलाई २-० गोलले पराजित गरेको छ। लिभरपुलका लागि साडियो मानेले ३१ मिनेट र थियागोले ९० मिनेटमा गोल गरे।
अंक तालिकामा शीर्ष स्थानको सिटीको ३५ खेलबाट ८० अंक छ। दोस्रो स्थानको म्यानचेस्टर युनाइटेडको ३३ खेलबाट ६७ अंक रहेको छ। चेल्सी ३५ खेलबाट ६४ अंक जोड्दै तेस्रो स्थानमा उक्लिएको छ। लिभरपुल ३४ खेलबाट ५७ अंक जोड्दै छैटौं स्थानमा छ।