युरो २०२० मा चेक गणतन्त्रले विजयी सुरूवात गरेको छ।
समूह 'डी' को खेलमा जित निकाल्ने क्रममा चेकले घरेलु टिम स्कटल्यान्डलाई २-० गोलले पराजित गर्यो।
खेलको ४२ मिनेटमा प्याट्रिक शिकले गोल गर्दै चेकलाई अग्रता दिलाए।
५२ मिनेटमा शिकले चेकको अग्रता दोब्बर पारे। सेन्टर एरियाबाट शिकले स्कटल्यान्डका गोलकिपर अघि बढेको मौकामा हानेको प्रहारले जाली चुमेको थियो। शिकले ४५ मिटर टाढाबाट हानेको प्रहारले जाली चुमेको हो।
त्यसपछि स्कटल्यान्डले गोल गर्न गरेको प्रयासमा चेकका गोलकिपर बाधक बनेका थिए।
आजको दोस्रो खेलमा पोल्यान्ड र स्लोभाकिया प्रतिस्पर्धा भिड्दैछन्। रसियाको सेन्ट पिटर्सवर्गमा हुने समूह 'ई' को खेल राति ९:४५ बजे सुरू हुनेछ।
पोल्यान्डका स्ट्राइकर रोबर्ट लेवान्डोस्कीले युरो कपमा ९ वर्षपछि गोल गर्न अभियानमा छन्।
उनले पछिल्लो पटक सन् २०१२ मा गोल गरेका थिए। त्यसो त टिममा रहेका खेलाडी मध्ये लेवान्डोस्की मात्र युरो कपमा गोल गर्ने खेलाडी हुन्।
यस्तै राति १२:४५ बजे हुने तेस्रो खेलमा स्पेन र स्विडेनबीच प्रतिस्पर्धा हुनेछ। समूह 'ई' को यो खेल स्पेनको सेभियामा हुनेछ।
छनोटका दुवै खेलमा स्विडेनविरुद्ध स्पेन अपराजित रहेको थियो। पहिलो खेलमा ३-० को जित निकालेको स्पेनले दोस्रो खेलमा १-१ गोलको बराबरी खेलेको थियो।
