युरो २०२० अन्तर्गत आज हुने पहिलो खेलमा स्विडेन र स्लोभाकिया प्रतिस्पर्धा गर्दैछन्। समूह 'ई' को यो खेल रसियाको सेन्ट पिटर्गवर्गमा साँझ ६:४५ मा हुनेछ।
स्लोभाकियाले पहिलो खेलमा पोल्यान्डलाई पराजित गरेको थियो। स्विडेनले भने स्पेनलाई बराबरीमा रोकेको थियो। स्विडेनलाई पराजित गर्न सके स्लोभाकिया अन्तिम खेलअघि नै अन्तिम १६ मा पुग्नेछ।
दुवै टिमले पहिलो खेलमा उत्कृष्ट खेल्दै सबैको ध्यान खिँचेका थिए। स्पेनले ८५ प्रतिशत बल नियन्त्रण गर्नाका बावजुद स्विडेनले बराबरी खेल्न सकेको थियो। यस्तै पोल्यान्डलाई स्लोभाकियाले स्तब्ध पार्दै जित हात पारेको थियो।
स्लोभाकियाले पछिल्ला पाँच खेलमा स्विडेनलाई हराउन सकेको छैन। पाँच मध्ये तीन खेलमा स्विडेन विजयी हुँदा दुई खेल बराबरीमा सकिएका छन्।
दिनको दोस्रो खेलमा क्रोएसिया र चेक गणतन्त्रबीच खेल हुनेछ। खेल राति ९:४५ मा हुनेछ। समूह 'डी' को यो खेलमा जित हात पार्न सके चेकले अन्तिम १६ मा स्थान पक्का गर्नेछ।
अघिल्लो खेलमा चेकले स्कटल्यान्डलाई पराजित गरेको थियो। यस्तै क्रोएसिया भने इंग्ल्यान्डसँग पराजित भएको थियो।
पछिल्ला तीन खेलमा क्रोएसियामाथि चेकले जित हात पार्न सकेको छैन। तीन मध्ये दुई खेल बराबरीमा सकिदा एक खेलमा क्रोएसिया विजयी भएको छ।
दिनको अन्तिम खेलमा राति १२:४५ बजे इंग्ल्यान्ड र स्कटल्यान्डबीच खेल हुनेछ।
पहिलो खेलमा क्रोएसियालाई पराजित गरेको इंग्ल्यान्डले स्कटल्यान्डलाई हराए अन्तिम १६ मा स्थान पक्का गर्नेछ।
दुई छिमेकी टिमबीच अहिलेसम्म भएका ३२ भिडन्त मध्ये इंग्ल्यान्डले १८ खेलमा जित हात पारेको छ। यस्तै ९ खेलमा स्कटल्यान्ड विजयी भएको छ। ५ खेल बराबरीमा सकिएका छन्।
पछिल्ला १५ खेल भने बराबरीमा सकिएका छैनन्। १५ मध्ये इंग्ल्यान्ड ११ र स्कटल्यान्ड चार खेलमा विजयी भएका छन्।
