युरो २०२० मा इटाली उच्च फर्ममा रहेको टिम मध्ये एक हो। समूह चरणमा तीनै खेल जित्दै इटाली अन्तिम १६ मा पुगिसकेको छ। इटालीले समूह चरणमा सात गोल गर्यो। कुनै गोल खाएन।
समूह चरणमा शतप्रतिशत जित निकालेसँगै इटालीले अन्तर्राष्ट्रिय खेलमा आफ्नो अपराजित खेल संख्या ३० पुर्यायो। यससँगै इटालीले अपराजित खेल संख्यामा आफ्नो राष्ट्रिय रेकर्डसँग बराबरी गर्यो।
यसअघि इटालीले सन् १९३९ मा पनि अपराजित खेल संख्या ३० खेलसम्म लम्ब्याएको थियो। इटालीले सन् १९३५ अक्टोबरदेखि १९३९ को जुलाईसम्ममा खेलेका ३० खेलमा हारेको थिएन।
त्यतिबेला इटालीले लगातार दोस्रो पटक विश्वकपको उपाधि जितेको थियो। यस्तै उसले सन् १९३६ को ओलम्पिक फुटबलमा पनि स्वर्ण पदक हात पारेको थियो।
अहिले इटालीले सेप्टेम्बर २०१८ मा पोर्चुगलसँग पराजय भोगेपछि खेलेका ३० अन्तर्राष्ट्रिय खेलमा हारेको छैन।
१० अक्टोबर २०१८ मा पोर्चुगलसँग १-० गोलले पराजित भएपछि इटालीले २५ खेलमा जित हात पारेको छ भने ५ खेलमा बराबरीमा रोकिएको छ।
यस्तै इटालीले सन् २०२१ मा खेलेका सबै खेलमा जित हात पारेको छ।
इटालीले सन् २०२१ मा ८ खेल खेलेको छ। यी आठ वटै खेलमा इटालीले गोलसमेत खाएको छैन। इटालीले आठ खेलमा २४ गोल गरिसकेको छ।
इटालीको प्रशिक्षकमा रोबर्टो मान्सिनी नियुक्त भएपछि इटालीले केवल २ खेलमा मात्र हार बेहोरेको छ।
चार पटकको विश्व विजेता इटाली अब आफ्नै रेकर्ड भंग गर्दै नयाँ रेकर्डको नजिक छ। इटालीले शनिबार राति युरो २०२० को अन्तिम १६ को खेलमा अस्ट्रियासँग खेल्दैछ। खेल राति १२:४५ मा हुनेछ। यो खेलमा जित हात पारे इटालीको अपराजित खेल संख्या ३१ पुग्नेछ र नयाँ राष्ट्रिय रेकर्ड बन्नेछ।
अपराजित खेल संख्याको रेकर्ड भने ब्राजिल र स्पेनको संयुक्त नाममा छ। दुवै टिमले लगातार ३५ खेलसम्म पराजय भोगेका थिएनन्।
यस्तै दोस्रो स्थानमा अर्जेन्टिना छ। अर्जेन्टिनाले सन् १९९१ देखि १९९३ को बीचमा ३१ खेलमा पराजय भोगेको थिएन।
अपराजित खेलको रेकर्ड