चेकका फरवार्ड प्याट्रिक शिकले 'युरो २०२० गोल अफ दि टुर्नामेन्ट' अवार्ड जितेको छ।
शिकले समूह चरणको पहिलो खेलमा स्कटल्यान्डविरुद्ध लङ रेन्जमार्फत सनसनीपूर्ण गोल गरेका थिए।
स्कटल्यान्डका गोलकिपर अघि बढेको मौकामा उनले सेन्टर एरियाबाट हानेको प्रहारले जाली जुमेको थियो।
उनको यो गोलले ८ लाख भोट पाएको थियो। सो खेलमा चेकले स्कटल्यान्डलाई २-० गोलले पराजित गरेको थियो।
योसँगै फ्रान्सका पाउल पोग्बाले स्विट्जरल्यान्डविरुद्ध अन्तिम १६ मा गरेको गोल, क्रोएसियाका लुका मोड्रिकले समूह चरणमा स्कटल्यान्डविरुद्ध गरेको गोल, इटालीका लोरेन्जो इसाइनले बेल्जियमविरुद्ध क्वार्टरफाइनलमा गरेको गोल र बेल्जियम केभिन डि ब्रुएनले डेनमार्कविरुद्ध समूह चरणमा गरेको गोल उत्कृष्ट दश गोलमा परेका छन्।
यसैगरी पोर्चुगलका क्रिस्टियानो रोनाल्डोले हंगेरीविरुद्ध समूह चरणमा गरेको गोल, स्पेनका अल्भारो मोराटाले सेमिफाइनलमा इटालीविरुद्ध गरेको गोल, डेनमार्कका मिकेल डम्सगार्डले इंग्ल्यान्डविरुद्ध सेमिफाइनलमा गरेको गोल, युक्रेनका यर्मोलेङ्कोले समूह चरणमा नेदरल्यान्ड्सविरुद्ध गरेको गोल र इटालीका चिएसाले सेमिफाइनलमा स्पेनविरुद्ध गरेको गोल पनि उत्कृष्ट दश गोलमा परेका छन्।
