अखिल नेपाल फुटबल संघ (एन्फा) ले आगामी असोज ३ गतेदेखि सुरु गर्ने भनेको सहिद स्मारक ए डिभिजन लिग रोक्न चार वटा क्लबले माग गरेका छन्।
थ्रीस्टार क्लब, जावलाखेल युथ क्लब, फ्रेन्ड्स क्लब र ब्रिगेड ब्वाइज क्लबले कोभिड-१९ का कारण लिगका गतिविधि सुचारू गर्न उपयुक्त नहुने दाबी गर्दै मंगलबार एन्फा अध्यक्षलाई सम्बोधन गर्दै पत्र दर्ता गराएका छन्।
आगामी असोज पहिलो सातादेखि लिग संचालन गर्नका लागि एन्फाले ए डिभिजन क्लबहरूलाई साउन १० सम्म टिम दर्ता गर्न भनेको छ।
सोहिअनुरुप क्लबहरूले खेलाडी भित्र्याएर टिम बनाउने क्रम जारी छ।
तर साउन १० सम्म टिम बनाउने विषयमा चार क्लबले भने असन्तुष्टि जनाएका छन्।
यसअघि असार १४ गते एन्फा र ए डिभिजन क्लबको संयुक्त बैठकमा लिगको मार्केटिङका लागि मात्र मिति घोषणा गर्ने सहमति भएको उनीहरूको दाबी छ।
'एन्फाबाट टिम दर्ता सम्बन्धि एक पक्षीय रुपमा पत्र पठाएकोमा असहमति जनाउँदै ए डिभिजन क्लबहरूको यथाशीघ्र बैठक बोलाउन अनुरोध गर्दछौं, ' जावलाखेलका अध्यक्ष महेन्द्र क्षेत्री, फ्रेन्ड्सका अध्यक्ष दीपक थापा, थ्रीस्टारका महासचिव सन्जिव शिल्पकार र ब्रिगेडका अध्यक्ष लालकुमार पुनले हस्ताक्षर गरेको पत्रमा भनिएको छ।
उनीहरूले कोभिड संक्रमणको दर न्यून नभइ ए डिभिजन लिग लगायत फुटबलका गतिविधि संचलान गर्न उपयुक्त नहुने तर्क गरेका छन्।