नेपाल एएफसी महिला एसियन कप २०२२ मा छनोट हुन असफल भएको छ।
छनोट चरणको दोस्रो खेलमा हङकङसँग बराबरी खेलेसँगै नेपाल छनोट चरणबाटै बाहिरिएको छ।
मंगलबार उज्वेकिस्तानमा भएको खेल गोलरहित बराबरीमा सकिएको हो। जित निकाल्न सकेको भए नेपालको आगामी वर्ष भारतमा हुने एसियन कपमा छनोट हुने सम्भावना हुन्थ्यो।
यसअघि नेपाल पहिलो खेलमा फिलिपिन्ससँग पराजित भएको थियो।
फिलिपिन्ससँग ८९ मिनेटसम्म अग्रता लिएको नेपालले दुई मिनेटको अन्तरमा दुई गोल खाँदा पराजय भोग्नु परेको थियो।
एसियन कप छनोटमा नेपाल समूह 'एफ'मा रहेको छ। नेपालको समूहमा फिलिपिन्स र हङकङ छन्।
अब समूहको अन्तिम खेलमा फिलिपिन्स र हङकङबीचको असोज ८ गते प्रतिस्पर्धा हुनेछ।
समूहको शीर्ष टिमले अर्को वर्ष भारतमा हुने एसियन कप खेल्नेछ।
