युरोपियन च्याम्पियन लिगअन्तर्गत समूह ‘बी’ को खेलमा इंग्लिस क्लब लिभरपुलले स्पेनिस क्लब एट्लेटिको म्याड्रिडलाई पराजित गरेको छ।
खेलमा लिभरपुलले आठौं मिनेटमा सलाहको गोलबाट अग्रता लिएको थियो। १३ मिनेटमा केइटाले गोल गर्दा लिभरपुलको अग्रता २-० मा पुगेको थियो।
त्यसपछि एट्लेटिकोका लागि एन्टोनी ग्रिजम्यानले दुई गोल फर्काउन सफल भए। ग्रिजम्यानले खेलको २०औं र ३४ औं मिनेटमा गोल गरेपछि खेल रोमाञ्चक बनेको थियो।
पहिलो हाफ २-२ गोलको बराबरीमा सकिएको खेलको ५२ मिनेटमा एट्लेटिको १० खेलाडीमा सीमित बन्यो। एट्लेटिकाका ग्रिजम्यान रातो कार्ड पाउँदै मैदान बाहिन जान बाध्य भए।
७८ मिनेटमा लिभरपुलले पेनाल्टीबाट गोल गर्दै खेलमा अग्रता लियो। लिभरपुलका लागि सलाहले पेनाल्टीबाट गोल गरे।
यो समूहको अर्को खेलमा पोर्चुगिज क्लब पोर्टोले इटालियन क्लब एसी मिलानलाई १-० गोलले हरायो।
समूहको अंक तालिकमा लिभरपुल ९ अंक जोड्दै शीर्ष स्थानमा छ। दोस्रो स्थानको एट्लेटिको र तेस्रो स्थानको पोर्टोको ४-४ अंक छ। एसी मिलानले तीन खेल खेल्दा अंक जोड्न सकेको छ।
यता समूह ‘डी’ को खेलमा स्पेनिस क्लब रियल म्याड्रिडले सानदार जित निकालेको छ। रियलले युक्रेनको शख्तर डोनेट्स्कलाई ५-० ले हरायो।
रियलका लागि भिनिसियस जुनियरले दुई गोल गर्दा रोद्रिगो र बेन्जिमाले एक एक गोल थपे। एक गोल आत्मघाती भएको थियो।
यो समूहको अंक तालिकामा सेरिफ तिरास्पोल ६ अंकसहित शीर्ष स्थानमा छ। दोस्रो स्थानको रियलको पनि ६ अंक छ। इन्टर मिलान ४ अंक जोडेर तेस्रो र शख्तर १ अंक बटुल्दै पुछारमा छ।