एक्सपर्ट एजुकेशन एण्ड भिसा सर्भिसेजले थाइल्याण्डमा हालै सम्पन्न नवौं थाइल्याण्ड ओपन कराँते च्याम्पियनसीपका पदक विजेता खेलाडीलाई आइतबार काठमाडौंमा नगद पुरस्कारसहित सम्मान गरेको छ।
महाराजगञ्जस्थित एक्सपर्टको शाखा कार्यालयमा आयोजित कार्यक्रममा सो प्रतियोगितामा नेपालको प्रतिनिधित्व गर्दै स्वर्ण पदक जित्न सफल सबिना श्रेष्ठ, रजत पदक विजेता सोमी राई तथा कास्य पदक विजेताहरू राजकुमार रसाइली र अनिश लामिछानेलाई सम्मान गरिएको हो।
स्वर्ण पदक विजेता श्रेष्ठलाई नगद ७ हजार रुपैयाँ, रजत पदक विजेता राईलाई ५ हजार रुपैयाँ तथा कास्य पदक विजेता रसाइली र लामिछानेलाई जनही ४ हजार रुपैयाँ, प्रमाणपत्र तथा अन्य उपहार प्रदान गरिएको हो।
सो अवसरमा खेलाडीका प्रशिक्षकहरूलाई पनि सम्मान गरिएको थियो।
सम्मान कार्यक्रममा टोखा नगरपालिकाका प्रमुख प्रकाश अधिकारी, काठमाडौं महानगरपालिका ३ का वडाअध्यक्ष दीपक केसी, टोखा नगरपालिका ७ का वडाध्यक्ष नरोत्तम राना, एक्सपर्ट फाउन्डेसनका अध्यक्ष देवीप्रसाद लम्साललगायत उपस्थित थिए।
कार्यक्रमलाई सम्बोधन गर्दै टोखा नगरपालिकाका प्रमुख अधिकारीले एक्सपर्टले व्यवसायिक सामाजिक उत्तरदायित्व निर्वाह गर्दै राष्ट्रका लागि पदक जित्ने खेलाडीलाई सम्मान गरेकोमा धन्यवाद तथा आभार व्यक्त गरे।
त्यसैगरी कामपा ३ का वडाध्यक्ष केसीले एक्सपर्टले नेपाली खेल क्षेत्रको प्रवर्द्धन र खेलाडीहरूको हौसला बढाउन गर्दै आएको कार्य निजी क्षेत्रसहित सबैका लागि अनुकरणीय रहेको उल्लेख गर्दै एक्सपर्टलाई धन्यवाद ज्ञापन गरे।
कार्यक्रममा एक्सपर्ट फाउन्डेसनका अध्यक्ष लम्सालले फाउण्डेसनले देशभर सामाजिक क्षेत्रमा गरेको कार्यको संक्षिप्त विवरण प्रस्तुत गरेका थिए।
एक्सपर्ट महाराजगञ्जका निर्देशक जयराम अर्यालले पदक विजेता खेलाडीहरूलाई नगद पुरस्कारसहित सम्मान गर्न पाउँदा आफूहरूलाई गर्व लागेको उल्लेख गरे।
उहाँले पछिल्लो ५ वर्षयता क्रिकेट, फुटबल कराँतेसहित अन्य खेलकुद र खेलाडीहरूको क्षमता विकासमा एक्सपर्टले उदार मनले सहयोग गरिरहेको भन्दै आगामी दिनमा त्यसलाई निरन्तरता दिने प्रतिवद्धता व्यक्त गरे।
सो अवसरमा सम्मानित खेलाडीहरूले राज्यका निकायले आफूहरूलाई खासै चासो नदिए पनि एक्सपर्टले गरेको सम्मानबाट आफूहरू अत्यन्त खुसी भएको र हौसला मिलेको उल्लेख गरे।
