खेलकुद परिषद्को सदस्य सचिवमा पुनः सिलवाल

सेतोपाटी संवाददाता

काठमाडौं, साउन १२

राष्ट्रिय खेलकुद परिषद्को सदस्य सचिवमा रमेशकुमार सिलवाल नियूक्त भएका छन्।

सिलवाललाई सोमबार मन्त्रिपरिषदले पुनः सदस्यसचिवमा नियूक्त गरेको ह‍ो। यस्तै परिषदको उपाध्यक्षमा शिव कोइराला नियुक्त भएका छन्। यसअघि सदस्यसचिव नियुक्तिका लागि तीन जनाको नाम सिफारिस गरिएको थियो।

निवर्तमान सदस्य सचिव सिलवाल, नेपाली राष्ट्रिय महिला भलिबल टिमकी पूर्वकप्तान अञ्जु श्रेष्ठ र भलिबल संघका पूर्वउपाध्यक्ष तथा नेकपाका केन्द्रीय सदस्य लिलबहादुर थापा मगरको नाम सिफारिस गरिएको थियो।

गएको वर्षको असारमा प्रधानमन्त्री ओली निकट सिलवालले खेलकुद परिषद्को सदस्य सचिवमा राजनीतिक नियुक्ति पाएका थिए। खेलकुद ऐन लागू भएपछि उनको पद निष्क्रिय हुँदा सिलवालले निवेदन हालेर फेरि सदस्य सचिव बन्न चाहेकोमा सफल भए।

युवा तथा खेलकुद मन्त्रालयले गठन गरेको सिफारिस समितिले सदस्यसचिव पदका लागि आह्वान गरेकोमा २७ जनाले आवेदन दिएका थिए।

मन्त्रालयका सचिव रामप्रसाद थपलिया, परिषद्का पूर्वकर्मचारी रिम रानाभाट र परिषद्को पूर्व बोर्ड सदस्य इन्दिरा निरौला रहेको सिफारिस समितिले आवेदनको अध्ययन गर्दै तीन जनाको नाम सिफारिस गरेको थियो।

राष्ट्रिय खेलकुद विकास ऐन, २०७७ लागू भएसँगै तत्कालीन सदस्यसचिव रमेशकुमार सिलवालको पदक निष्क्रिय भएको थियो। त्यसपछि युवा तथा खेलकुद मन्त्रालयले गठन गरेको सिफारिस समितिले परिषद्‌को सदस्यसचिवका लागि दरखास्त आह्वान गरेको थियो।

समितिले निवेदन दिएकहरुको कार्ययोजना अध्ययन गरेर सदस्यसचिव सिफारिस गरेका तीन जनाको नाम मन्त्रालयमा बुधबार बुझाएको थियो। मन्त्रालयले तीनै जनाको नाम मन्त्रिपरिषद्‌मा पेश गरेको थियाे।

प्रकाशित मिति: सोमबार, साउन १२, २०७७ १०:४९

सिफारिस