राष्ट्रिय खेलकुद परिषद्ले खेलकुद प्रतियोगिता, खेल प्रशिक्षण र खेलकुद गतिविधि अनिश्चितकालका लागि बन्द गरेको छ।
कोरोना भाइरसको संक्रमण बढ्दै गएपछि परिषद्ले अर्को सूचना जारी नभएसम्मका लागि सबै गतिविधि र कामहरु बन्द गरिएको जनाएको हो।
यसअघि परिषद्ले कोरोनाका कारण चैत पहिलो सातादेखि नै खेलकुद गतिविधि बन्द गरेको थियो।
त्यसपछि सरकारले भदौ पहिलो सातादेखि अन्तर्राष्ट्रिय खेलकुद प्रतियोगितालाई तयारी गर्ने दिने निर्णय गरेको थियो। तर कोरोना भाइरसको संक्रमण बढेपछि अन्तर्राष्ट्रिय प्रतियोगिताको तयारी पनि स्थगित भइसकेका छन्।
पछिल्लो समय खेलकुद क्षेत्रमा पनि कोरोना संक्रमण भइरहेको छ। स्क्वास प्रशिक्षक हिरा थापा, राष्ट्रिय फुटबल टिमको बन्द प्रशिक्षणमा बोलाइएका एक खेलाडी र नेपाल ओलम्पिक कमिटीका दुई कर्मचारीलाई कोरोना संक्रमण भएको पुष्टि भइसकेको छ।
जसका कारण सातदोबाटोमा रहेका खेलकुदका कार्यालय बन्द गरिएका छन्। अब त्रिपुरेश्वरमा रहेको खेलकुद परिषद्को कार्यालय पनि बन्द गरिने भएको छ।
खेलकुद परिषद्ले सोमबार निकालेको विज्ञप्तिमा भनिएको छ, 'हाल विश्वमा महामारीको रुपमा फैलिएको कोरोना भाइरस (कोभिड–१९) काठमाडौं उपत्यका लगायत नेपालका विभिन्न स्थानहरुमा व्यापक रुपमा फैलिन गई जनस्वास्थ्यमा ठूलो समस्याका रुपमा देखा परेको हुँदा राष्ट्रिय खेलकुद परिषदबाट सम्पादन गरिने अति जरुरी कामबाहेक हाललाई अर्को सूचना जारी नभएसम्मका लागि खेलकुद प्रतियोगिता, खेल प्रशिक्षण लगायत खेलकुद सम्बन्धी सम्पूर्ण गतिविधि तथा काम कारवाहीहरु बन्द गरिएको व्यहोरा सम्बन्धित सबैलाई यसै सूचनाद्वारा जानकारी गराइन्छ।'
