गएरातिदेखि परेको अविरल वर्षाका कारण वीरगन्जको अधिकांश भूभाग जलमग्न भएका छन्।
डुबानका कारण नगरवासी प्रत्यक्ष मारमा परेका छन्। रातिदेखि परेको वर्षाका कारण वीरगन्जको पानीट्याङ्की, श्रीपुर, मुर्ली, नयाँटोल, भिस्वालगायतका एक दर्जनभन्दा बढी भागहरु डुबानमा परेका छन्। नगर क्षेत्रका अधिकांश भाग डुबानमा परेका कारण केही विद्यालयको आजको नियमित पढाइसमेत अवरुद्ध भएको छ।
बाक्लो बस्तीका कारण उचित निकासको अभावमा नगरका विभिन्न भाग डुबानमा परेको स्थानीयवासीले बताएका छन्। नालामाथि नै घर बनाइएका कारण डुबानको समस्या देखिएको वीरगन्ज उपमहानगरपालिकाका कार्यकारी अधिकृत ताराबहादुर कार्कीले बताए ।
उनले नाला तथा ढल अतिक्रमणको क्रम रोकिएको खण्डमा मात्रै पानीको सहज निकास हुने बताए । उचित निकासकै अभावमा वीरगन्जमा हरेक वर्ष वर्षायाममा सर्वसाधारणले डुबानको समस्या झेल्दै आएका छन्। रासस
