कञ्जन्जङ्घा हिमालमा मरेका आरोहीको शव ननिकालिने भएको छ।
हिउँ पग्लिएर शव उठाउन कठिनाइ हुने तथा खर्च पनि अधिक लाग्ने भएपछि गएको जेठको पहिलो हप्ता कञ्चनजङ्घा हिमालमा मरेका आरोहीको शव हिमालमै छोडिने भएको हो।
हिमाल पग्लिएर शव उठाउन समस्या पर्ने र उद्धारका लागि पठाइएको टोली नै जोखिममा पर्ने भएपछि मृतकका आफन्त र आरोहणमा पठाउने टे्रकिङ एजेन्सीले अब शव नठाउने निधो गरेका छन्।
उद्धारमा पठाएको टोली पनि शव रहेको स्थलमा पुगेर शव उद्धार गर्न नसक्ने भन्दै कञ्चनजङ्घा आधार शिविर पुगेर फर्किएको छ।
“एजेन्सीले हिम्मत पनि गरेको हो, तर उद्धार प्रयास सम्भव भएन”, सेभेन समिट ट्रकिङ एजेन्सीका प्रवन्धक मिङमा शेर्पाले भने ।
उनले मे महिनाको दोस्रो सातादेखि नै हिमालको हिउँ पग्लने क्रम सुरु हुने भएकाले यो उचाईबाट शव निकाल्नु उद्धारकर्ताहरु आफैँका लागि पनि जोखिम हुने बताए । उद्धारकर्ताले नै नसक्ने भनेपछि शव ननिकालिने निर्णय गरिएको प्रवन्धक शेर्पाले बताए ।
कञ्चनजङ्घा आरोहणको ४ नं आधार शिविर अर्थात सात हजार ४०० मिटरको उचाईको भूभागमा दुई नेपाली र तीन विदेशीको ज्यान गएको थियो।
हिउँमा परी ज्यान गुमाउनेमा सङ्खुवासभा मकालु–५ बस्ने फुदोर्जी शेर्पा र सङ्खुवासभाकै हटियाखोला–७ बस्ने विवश गुरुङ रहेका छन्। विदेशीहरुमा हंगेरीयन नागरिक पिटर किस, जेड सोल्ट इरोस तथा कोरियन नागरिक नामसो पार्क रहेका छन्। रासस
