नेपाल विद्यार्थी सङ्घले अन्तिम अवस्थामा आएर स्ववियु निर्वाचन स्थगित गरिएको प्रति आपत्ति जनाउँदै तत्काल नयाँ मिति घोषणा गर्न माग गरेको छ।
नेविसङ्घका अध्यक्ष रञ्जित कर्णले आज एक विज्ञप्ति जारी गरी सम्पूर्ण क्याम्पसमा स्ववियु निर्वाचनको वातावरण तथा प्रक्रिया तीव्र गतिमा तयारी भइरहेको बेला निर्वाचन स्थगित हुनु दुःखद भएको बताउँदै निर्वाचन रोक्नु लोकतन्त्र विरोध कार्य भएको उल्लेख गरेका छन् ।
विज्ञप्तिमा तत्काल स्ववियु निर्वाचनको मिति घोषणा नगरिएमा सरकार र त्रिभुवन विश्वविद्यालयका उपकुलपति तथा पदाधिकारीविरुद्ध आन्दोलिन गर्ने चेतावनी दिइएको छ।
“विद्यार्थी आन्दोलनबाट स्थापित संस्थालाई जोगाउन त्रिभुवन विश्वविद्यालयलगायत विभिन्न क्याम्पसमा भएको तालाबन्दी खोल्न तत्काल सम्बन्धित पक्षलाई आग्रहका साथै नक्कली भर्नाको तत्काल छानबिन गर्न र पुनः तत्काल स्ववियु निर्वाचनको मिति घोषणा गर्न तथा निष्पक्ष निर्वाचन गराउन विज्ञप्तिमा माग गरिएको छ।
तत्काल निर्वाचनको मिति घोषणा नगरिए नेविसङ्घले जेठ २० देखि २२ गतेसम्म गरिने आन्दोलनका कार्यक्रम समेत सार्वजनिक गरेको छ।
आन्दोलनका कार्यक्रम यस्ता छन् ।
- १९ गते देखी प्रत्यका दिन ९ देखी १० बजेसम्म प्रर्दशन गर्ने ।
- २० गते देशभर सरकारी गाडी चलाउन रोक लगाउने ।
- २१ गते त्रि।विका उपकुलपति कार्यलय घेराउ गर्ने ।
- २२ गते मन्त्री परिसदका अध्यक्ष तथा त्रि।विका कुलपति खिलराज रेग्मीको त्रिचन्द्र क्याम्पस आगाडी पुत्ला दहन गर्ने ।
- २३ गते उपत्यका बन्द गर्ने ।
रासस
