दक्षिण भारतीय अभिनेता विजय देवरकोन्डाले सन् २०२२ मा बलिउडमा प्रवेश गरेका थिए।
बलिउडमा उनको पहिलो फिल्म थियो 'लाइगर'। पुरी जगन्नाथले निर्देशन गरेका फिल्मप्रति दर्शक निकै आशावादी थिए। फिल्ममा करण जोहरले लगानी गरेका थिए। फिल्मको प्रमोशनमा कलाकारले निकै दौडधुप पनि गरेका थिए। तर फिल्मले बक्स अफिसमा राम्रो कमाइ गर्न सकेन।
हाल विजय आगामी फिल्म 'फ्यामेली स्टार' रिलिजको तयारीमा छन्। यो फिल्म ५ अप्रिलदेखि प्रदर्शन हुँदैछ। फिल्ममा विजयसँगै मृणाल ठाकुरको मुख्य भूमिका छ। यस फिल्मको प्रेस मिटमा उनलाई 'लाइगर' पछि जिन्दगीमा के परिवर्तन आयो भनेर प्रश्न गरिएको थियो। जबाफमा उनले भने, 'कुनै परिवर्तन आएको छैन। मात्र यति परिवर्तन आएको छ कि आगामी तीन फिल्मको कमाइको कुरा गर्दिनँ।'
'लाइगर' रिलिजअघि विजयले २०० करोड भारू कमाउने बताएका थिए। भारतीय सञ्चारमाध्यम टिभी ९ हिन्दीका अनुसार १०० करोड बजेटमा बनेको फिल्मले ५६ करोड भारू कमाएको थियो।
यो फिल्म फ्लप भएपछि विजयको उक्त अन्तर्वार्ता भाइरल भएको थियो। यस फिल्ममा विजयले २०/२५ करोड भारू लिएका थिए। फिल्ममा विजयसँगै अनन्या पाण्डे, चंकी पाण्डे, राम्या कृष्णन, रोनित राय, मकरन्द देशपाण्डेलगायत कलाकारको अभिनय छ।
