भैंसेपाटी मन्त्री क्वार्टर पुनर्निर्माणको अहिलेको अवस्था

संघीय मन्त्रीहरूको बसोबासका लागि ललितपुर भैंसेपाटीमा एक अर्ब रूपैयाँ लगानी गरेर निर्माण गरिएको सरकारी आवास क्षेत्र जेनजी आन्दोलनमा तहसनहस पारियो।

त्यसको पुनर्निर्माण कसरी हुँदैछ भनेर हामीले भदौ ७ गते आइतबार स्टोरी गरेका थियौं। हेर्नुहोस्: मन्त्रीहरूले यसपालिको दसैं भैंसेपाटीको एउटै कम्पाउन्डमा सँगसँगै मनाउन पाउलान्?

त्यही सिलसिलामा आज भैंसेपाटी आवास क्षेत्र पुनर्निर्माणका तस्बिरहरू देखाउँदै छौं।

यो फोटो स्टोरी गर्न भैंसेपाटी मन्त्री क्वार्टर जाँदा हामीलाई भित्रै गएर फोटो खिच्न दिइएन। पहिले प्रहरी मात्र तैनाथ रहने क्वार्टर क्षेत्रमा अचेल सेना तैनाथ गरिएको रहेछ। उनीहरूले सुरक्षा कारण देखाउँदै भित्र जान नदिएपछि हामीले बाहिरबाटै पुनर्निर्माणको झलक देखाउने कोसिस गरेका छौं।

यही असोज मसान्तभित्रै अर्थात् दसैंभन्दा अगाडि नै पुनर्निर्माण सक्ने योजना रहेकाले आवास क्षेत्रका धेरै घरमा धमाधम काम भइरहेको देखिन्छ।

हामीले क्यामराको लेन्सबाट हेर्दा धेरै घरमा कामदारहरू रंगरोगन र विभिन्न मर्मतसम्भारमा खटिएका देखिए। कतिपय घरका भित्तामा बाँसका भर्‍याङहरू ठड्याएर राखिएका थिए।

केही घरमा गाडीहरू पनि पार्क गरिएका थिए। यहाँका २७ घरमध्ये दुईवटामा बसोबास भइरहेको छ।

जेनजी आन्दोलन बेला आगजनीबाट जोगिएको एउटै मात्र रक्षामन्त्रीको क्वार्टरमा भौतिक पूर्वाधार तथा सहरी विकास मन्त्री सुनिल लम्साल बस्दै आएका छन्। त्यसबाहेक एउटा घरको पुनर्निर्माण सम्पन्न भई उपसभामुख रूबी ठाकुर सरिसकेको संघीय सचिवालय निर्माण तथा व्यवस्थापन कार्यालयका सुपरिटेन्डेन्ट इन्जिनियर चक्रवर्ती कंठले बताएका छन्।

उनका अनुसार राष्ट्रियसभाका उपाध्यक्षलाई पनि केही दिनभित्रै मन्त्री आवास परिसरकै एउटा घरमा सार्ने तयारी भइरहेको छ।

अहिले मन्त्रिपरिषदका एक जना भैंसेपाटी क्वार्टरमा, एक जना मन्त्रालयमै र ६ जना पुल्चोकको हरिहर भवनस्थित पुरानो मन्त्री क्वार्टरमा छन् भने बाँकी आ–आफ्नै घरमा बस्छन्।

आन्दोलनमा धेरै क्षति पुगेका ११ वटा घर र कम क्षति पुगेका १६ वटा घरलाई छुट्टाछुट्टै ठेक्का लगाएर पुनर्निर्माण सुरू गरिएको छ।

पहिलो चरणको पुनर्निर्माणमा संरचनागत मर्मत पर्छन्, जसका लागि ८ करोड ६० लाख रूपैयाँ बजेट लाग्ने अनुमान गरिएको छ। त्यस्तै, दोस्रो चरणमा पुनर्निर्माणका काम पर्छन्, जसको बजेट साढे १५ करोड रूपैयाँ छ।

तेस्रो चरणमा आन्तरिक सजावटका काम गरिने छन्। यसका लागि झन्डै १८ करोड रूपैयाँ लाग्ने अनुमान गरिएको छ।

पुनर्निर्माणलाई तीव्रता दिन यी तीनै चरणका काम सँगसँगै भइरहेका छन्। सबै घरको पुनर्निर्माण सकेर मात्र आन्तरिक सजावट गर्दा धेरै समय लाग्ने भएकाले पुनर्निर्माण र सजावट सँगसँगै अघि बढाइएको हो।

भैंसेपाटीमा ९६ रोपनी क्षेत्रफलमा २७ वटा आवासीय भवन बनेका थिए। तीमध्ये २४ वटा संघीय मन्त्रीका लागि छुट्याइएको थियो भने ३ वटा राष्ट्रियसभा अध्यक्ष, उपाध्यक्ष र प्रतिनिधिसभाका उपसभामुखका लागि निर्माण गरिएका थिए।

झन्डै १ अर्ब रूपैयाँ लगानी गरिएको भैंसेपाटी सरकारी आवासमा प्रत्येक घरको भुइँतलामा वेटिङ रूम र मिटिङ रूम थिए। त्यस्तै, सचिवालय र सर्भिस रूम पनि बनाइएका थिए।

पहिलो तलामा मन्त्रीको निवास थियो भने दोस्रो तलामा पाहुना कक्ष, योग कक्ष लगायत थिए। त्योभन्दा माथिल्लो तलामा भान्सा थियो।

मन्त्री क्वार्टर परिसरमै हेल्थ क्लब, स्विमिङ पुल लगायतका संरचना पनि निर्माणाधीन थिए। सार्वजनिक हल र हेलिप्याडको निर्माण पनि हुँदै थियो। यी काम पूरा नहुँदै यहाँका सबै संरचना आगो लगाएर ध्वस्त पारिएका थिए।

भैंसेपाटी मन्त्री क्वार्टरमा भइरहेको पुनर्निर्माण, हेर्नुहोस् तस्बिरमा —

bhaisepati--(11)-1787540786.jpg