नेपाली बजारमा सामसुङका दुई स्मार्टफोन ग्यालेक्सी ‘एस एट’ र ‘एस एट प्लस’ आज सार्वजनिक गरिएको छ। नेपालका लागि सामसुङ मोबाइलको आधिकारीक बिक्रेता आइएमसले दुई स्मार्टफोन सार्वजनिक गरेको हो।
नेपाली बजारमा ‘एस एट’ को मूल्य ८८ हजार ९ सय र प्लसको ९९ हजार ९ सय रुपैयाँ तोकिएको छ। वैशाख २२ गतेदेखिमात्र ग्राहकहरुले किन्न पाउने स्मार्टफोनको प्रि बुकिङ भने खुल्ला भएको छ। वेबसाइटमा गएर बुकिङ गर्न सकिने छ।
सामसुङका यी नयाँ स्मार्टफोन किन्दा ग्राहकहरुले एनसेलको सिमसँगै आठमहिनाको लागि प्रत्येक महिना ८ जिबी डाटा पनि पाउनेछन्। त्यस्तै फोनको ६ महिनासम्मको लागि इन्स्योरेन्सको व्यवस्था गरिएको इमआईले जानकारी दिएको छ।
अन्तराष्टिय बजारमा आइसकेको ‘एस एट’ मा ५.८ तथा ‘एस एट प्लस’ मा ६.२ इन्चको ‘इन्फिनिटी डिस्प्ले’ रहेको छ। दुवै स्मार्टफोनमा गोरिल्ला ग्लासको प्रयोग गरिएको छ।
२९६० क्रस १४४० पिक्सल रिजोलुसन रहेको दुवै फोनमा ४ जिबी र्याम रहेको छ। २५६ जिबीसम्मको माइक्रो एसडी कार्ड प्रयोग गरी क्षमता बढाउन सकिन्छ। एन्ड्रोइड ७ नोगाट भर्सनको अपरेटिङ सिस्टमको दुवै स्मार्टफोनमा १२ मेगापिक्सलको रियर क्यामेरा छ भने फ्रन्ट क्यामेरा ८ मेगापिक्सल रहेको छ।
पानी र धूलो छिर्न नसक्नेगरी तयार गरिएको यी स्मार्टफोनहरुमा ‘एस एट’ मा ३ हजार एमएएच तथा ‘एस एट प्लस’ को ३५ सय एमएएच क्षमताको ब्याट्री समावेश गरिएको छ। अन्तराष्टिय बजारमा ब्ल्याक, सिल्भर, ग्रे र कोरल ब्लु र गोल्डेन कलरमा फोनहरु आएका छन्।
अन्तराष्टिय बजारमा कम्पनीले ग्यालेक्सी ‘एस एट’ को खुद्रा मूल्य ७२० डलर तथा ‘एस एट’ प्लसको ८४० डलर तोकेको छ।