च्याम्पियन्स लिगको फाइनलमा आफ्नो बुवाले २ गोल हानेपछि भावुक बनेका क्रिस्टियानो रोनाल्डोका छोराको तस्बिर सार्वजनिक भएको छ। रोनाल्डोको २ गोलको सहयोगले आइतबार बिहान रियल म्याड्रिड ४–१ गोलले युभेन्ट्सलाई पराजित गर्दै उपाधि जित्न सफल भएको हो।
रोनाल्डोको खेलका कारण म्याड्रिडले च्याम्पियन्स लिगको उपाधि रक्षा गरेको थियो। म्याड्रिड गत वर्षको उपाधि विजेता पनि हो। खेल जितेपछि मैदानमा आफ्नो बुवालाई परिवारसहित भेट्न गएका क्रिस्टियानो रोनाल्डो जुनियर भावुक बनेका थिए। उनले आँखा पुछ्दै गरेको तस्बिर विदेशी फोटो पत्रकारको क्यामरामा कैद भएको थियो।
३२ वर्षीय रोनाल्डोको छोरा जुनियर रोनाल्डोको जन्म २०१० मा भएको थियो। उनको आमाको परिचय अहिलेसम्म गोप्य राखिएको छ।