प्रधानमन्त्री शेरबहादुर देउवाले निर्वाचनअघि संविधान संसोधन सम्भव नभएको बताएका छन्। शुक्रबार संसद बैठकमा बोल्दै प्रधानमन्त्री देउवाले निर्वाचनपछि मात्र संविधान संसोधन हुने बताएका हुन्।
संविधानको स्वीकार्यता बनाउन संसोधन आवश्यक भएको भन्दै विपक्षीदलको पनि यसमा साथ चाहिने उनले बताए।
'संविधानको स्वीकार्यता बनाउनुपर्छ। मधेसमा आन्दोलन भयो। उनीहरुलाई पनि संविधानको अपनत्व बनाउनपर्छ। यसको लागि विपक्षी दलको साथ चाहिन्छ। अब निर्वाचनअघि संविधान संसोधन सम्भव छैन। निर्वाचनलगत्तै संविधान संसोधन गर्न प्रयास हुनेछ,' उनले भने।
संसद बैठकमा मधेशवादी दल राजपाका नेताहरुले आफ्ना माग पूरा नगरे निर्वाचनमा भाग नलिने भनेका थिए। सीमाङ्कन लगायतका संसोधन सम्बन्धी विधेयक संसदमा विचाराधीन छ।
त्यो निर्वाचनपछि पास हुने भन्दै देउवाले राजपालाई विश्वास दिलाए र उनीहरुलाई निर्वाचनमा आउन आग्रह गरे।
'म विश्वास दिलाउन चाहन्छु तपाईँहरु निर्वाचनमा आउनुहोस्। हामी पास गराएरै छाड्छौँ। तर, अहिले हुने स्थिति रहेन,' उनले भने।
पहिलो चरणको स्थानीय निर्वाचनअघि राजविराजमा भएको घटनाबारे आफूले अहिलेसम्म केही बुझ्न नसकेको पनि उनले बताए।
