असार १४ गते सम्पन्न दोस्रो चरणको स्थानीय निकाय निर्वाचनमा धरान उपमहानगरपालिकाबाहेक अहिलेसम्म बाँकी ३३३ स्थानीय तहकोमत परिणाम घोषणा भइसकेको छ। प्रदेश नम्बर १, ५ र ७ नम्बर अन्तर्गत ३५ जिल्लाका ३३४ स्थानीय तहका लागि भएको दोस्रो चरणमा निर्वाचनमा ३३३ स्थानीय तहको मतगणना कार्य पूरा भएको हो।
पछिल्लो मतगणनाअनुसार, नेकपा एमाले १५०, नेपाली कांग्रेस १२२, नेकपा (माओवादी केन्द्र) ३८, संघीय समाजवादी फोरम ८, नेपाल लोकतान्त्रिक फोरम नेपाल ६, राप्रपाका ४, राष्ट्रिय जनमोर्चा २ र स्वतन्त्र ३ जना उम्मेदवार प्रमुख/अध्यक्ष पदमा विजयी भएका छन्।
दोस्रो चरणको निर्वाचनको हालसम्म घोषित परिणाममध्ये प्रमुख/अध्यक्षमा पदमा एमालेले सबैभन्दा धेरै अर्थात् ४५ प्रतिशत पदमा विजयी हासिल गरेको छ भने कांग्रेसले ३६.६ र माओवादी केन्द्रले ११.४ प्रतिशत पदमा जित हात पारेको छ।
उपप्रमुख एवम् उपाध्यक्षमा एमालेका १७४, कांग्रेसका १०४, माओवादी केन्द्रका ३८, संघीय समाजवादी फोरम नेपालका सात, नेपाल लोकतान्त्रिक फोरमका ६, राष्ट्रिय जनमोर्चाका दुई, राप्रपाका दुई जना उम्मेदवार विजयी भएको निर्वाचन आयोगको तथ्याङ्कमा उल्लेख छ।
१५ हजार ३८ जनप्रतिनिधिको चयन हुनुपर्नेमा अब बीसवटा वडा भएको धरान उपमहानगरपालिकाको अन्तिम परिणाम आउन बाँकी छ।