नेपाली युवा टोलीका कप्तान विमल घर्तीमगरले आफू सञ्चो भएको जानकारी दिएका छन्। बंगलादेशविरुद्ध मैत्रीपूर्ण खेलमा विमल घाइते बन्न पुगेका थिए। २० मिनेटमा अञ्जन विष्टको पासमा गोल गरेका विमल त्यसपछि घाइते भएका थिए।
उनी डिबक्सबाट दोस्रो गोलका लागि कडा प्रहार गर्ने क्रममा २६ मिनेटमा घाइते भएका थिए। उनी लड्न पुग्दा कुममा चोट लागेको थियो। मैदानबाहिर बसेर उपचार गर्ने क्रममा कुममा निकै पीडा भएको महसुस गरेपछि ३१ मिनेटमा उनको स्थानमा विश्वास श्रेष्ठलाई पठाइएको थियो।
खेल सकिएपछि पत्रकारहरुसँग साक्षात्कार हुँदै उनले भने, ‘म ठिक छु। कुममा असाध्य पीडा भएको हुनाले खेल्न सकिन। तर, त्यो चोट सामान्य हो।’
विमलकै गोलका कारण नेपालले बंगलादेशको युथ–२३ टोलीलाई १–० ले पराजित गरेको थियो। नेपाली युथ–२३ टोली एएफसी युथ–२३ छनोटमा भाग लिन विहिबार युनाइटेड अरब इमिरेट्स (युएई) तर्फ लाग्दैछ। नेपालले आफ्नो समूहमा उज्वेकिस्तान, युएई र लेबननसँग खेल्ने कार्यक्रम रहेको छ।
