आक्रस ग्रुप प्राइभेट लिमिटेडले चिनियाँ प्रसिद्ध कम्पनी हाइगरका मिनिबस नेपाली बजारमा भित्र्याएको छ । मङ्गलबार राजधानीमा अायोजित एक कार्यक्रममा उपप्रधानमन्त्री एवम् परराष्ट्रमन्त्री कृष्णबहादुर महराले उक्त मिनिबसको उद्घाटन गरेका हुन् ।
सो अवसरमा उनले सार्वजनिक यातायातका निम्ति ठूला सवारीसाधन प्रवर्द्धन गर्ने सरकारी नीति रहेको बताउँदै चालू आर्थिक वर्षको बजेट र मौद्रिक नीतिले पनि त्यसलाई बढावा दिएकाले उपलब्ध सुविधाको भरपूर उपयोग गर्न सवारीसाधन आयातकर्तालाई आग्रह गरे ।
मुलुकको पर्यटन विकासको महत्वपूर्ण पूर्वाधारको रुपमा रहेको परिवहनको पाटोलाई लक्षित गरी राष्ट्रिय अर्थतन्त्रमा योगदान गर्ने पर्यटन उद्योगको विकासमा लाग्न उनले उद्यमी व्यवसायीलाई अनुरोध पनि गरे ।
आक्रस ग्रुपका प्रमुख कार्यकारी अधिकृत रजुल श्रेष्ठले विश्वका एकसयभन्दा बढी मुलुकमा हाइगरका परिवहन निर्यात भइरहेका जानकारी दिँदै नेपाल भ्रमणमा आउने पर्यटकलाई लक्ष्य गरी हाइगरका मिनिबस आयात गरिएको बताए ।
