स‌ंविधान संशोधन र सरकारमा जानेबारे राप्रपा केन्द्रीय समिति अनिर्णित

सेतोपाटी संवाददाता

काठमाडौ, साउन ६

स‌ंसदको चौथो ठूलो दल राष्ट्रिय प्रजातन्त्र पार्टीको केन्द्रीय समिति बैठकले संविधान संशाेधन र सरकारमा सहभागिताबारे निर्णय गर्ने जिम्मा केन्द्रीय कार्यसम्पादन समितिलाई दिएको छ।

राजधानीमा तीन दिनसम्म चलेको केन्द्रीय समितिको बैठकपछि अायोजित पत्रकार सम्मेलनमा अध्यक्ष कमल थापाले संविधान संशोधन र सरकारमा सहभागी हुने विषय एउटै नभएको र संविधान संशोधन विधेयकमा पार्टीको प्रतिवद्धतालाई पटकपटक दाेहोर्याएको बताए।

'संविधान संशोधन विधेयककाे पक्षमा हामी छाैं,' थापाले भने, 'यस विषयमा पार्टीभित्र असन्तुष्टि पनि छन्, केन्द्रीय कार्यसम्पादन समितिले याे असन्तुष्टिलाई हल गर्छ।'

प्रजातान्त्रिक पार्टीभित्र मतभिन्नता हुनु सामान्य भएको उल्लेख गर्दै थापाले पार्टीको निर्णयलाई सबैले सम्मान गर्नुपर्ने बताए।

'संशोधन विधेयकमा हाम्राे सकारात्मक धारणा छ, यसमा शंका गर्नु अावश्यक छैन, ' थापाले भने, ' राप्रपाले भाेट हाल्ने स्थितिमा संशोधनको पक्षमा राप्रपाको भाेट सबै पर्छ।'

थापाले सरकारमा जाँदा उपप्रधानमन्त्रीसहित चार मन्त्रालय दिन प्रधानमन्त्री तयार भएको भए पनि यस विषयमा छलफल गर्न बाँकी रहेको बताए।

पछिल्लो समय सत्तारुढ दलले सरकारमा सहभागिताका लागि स‌ंशोधनका पक्षमा राप्रपाका सबै सांसदले भोट हाल्ने ग्यारेन्टी मागेका थिए।

राप्रपाका सबै सांसदले भोट नहाल्दा संशोधनको पक्षमा दुई तिहाइ नपुग्ने भएपछि संशोधन विधयेकलाई सरकारले मतदान लिएको छैन। संविधान संशोधन नहुने भएपछि राप्रपालाई तत्काल सरकारमा ल्याउन नहुने अावाज सत्तारुढ दलभित्रै उठेको छ।

प्रकाशित मिति: शुक्रबार, साउन ६, २०७४ ०६:००

सिफारिस