कोराना भाइरस (कोभिड—१९) को जोखिम न्यूनीकरणका लागि सरकारले लागू गरेको लकडाउनलाई प्रभावकारीरुपमा कार्यान्वयन गराउन म्याग्दीमा स्वयंसेवी खटाइएको छ।
रघुगंगा गाउँपालिकाले माइकबाट कोरोना भाइरस (कोभिड १९) सम्बन्धि सूचना प्रवाह गर्न र लकडाउनलाई प्रभावकारी बनाउन प्रहरीको साथमा स्वयंसेवी खटाएको हो।
सात जनाको समूहमा रहेका स्वयंसेवीको टोली वडाका प्रत्येक घरमा पुगेर सूचना प्रवाह गर्नुका साथै कोरोना भाइरस सम्बन्धि जिज्ञासा राख्नेलाई बुझाउने गरेका स्वयंसेविका पुष्पा गर्वुजाले बताइन्।
पहिलो चरणमा रघुगंगा गाउँपालिका वडा नं १ बाट सुरु गरिएको यो अभियान गाउँपालिकाका ८ वटै वडामा सञ्चालन गरिने गाउँपालिकाका अध्यक्ष भवबहादुर भण्डारीले जानकारी दिए।
'आठ वटै वडामा जनप्रतिनिधिले सघाउने गरी स्वयंसेवक खटाएर क्वारेन्टाइनदेखि बस्ती बस्तीमा जनतालाई सरकारको निर्णयसंगै कोरोना भाइरसको जोखिम न्यूनीकरणको अभियानलाई सक्रिय बनाउँछौं,' उनले भने, 'स्वयंसेवकलाई गाउँपालिकाले आवश्यकता अनुसार सहयोग गर्छ, समुदायमा उहाँहरुले दिएको योगदानको उचित मूल्याङ्कन हुन्छ।'
अनावश्यक काममा घर बाहिर जाने, भिडभाड र खेलकूदजन्य गतिविधिमा सहभागी हुने, विदेशबाट आएकाहरुले होम क्वारेन्टाइनमा बस्न आनाकानी गर्ने गरेकाले जनप्रतिनिधिसँगै स्वयंसेवकहरु परिचालन गरिएको उनको भनाइ छ।
स्वयंसेवकलाई दैनिक ८ सय रुपैयाँ भत्ता र खानाको व्यवस्था गाउँपालिकाले गरेको छ। उत्कृष्ट काम गर्नेलाई सम्मानसमेत गरिने अध्यक्ष भण्डारीले बताए।
गाउँपालिकाभित्र हरेक वडामा निर्मित क्वारेन्टाइनमा अहिलेसम्म ११ जना आएका छन्। चैत १ गते यता आएका र क्वारेन्टाइनमा आउन आनकानी गरेकालाई जनप्रतिनिधिले सवारीसाधन लिएर उनीहरुका घरमा नै जाने योजना रहेको समेत अध्यक्ष भण्डारीले बताए।