प्रधानमन्त्री केपी शर्मा ओलीले आइतबार प्रतिनिधि सभा विघटन गरेको विरोधमा बुटवलमा विरोध प्रदर्शन भएको छ।
मानवअधिकार तथा शान्ति समाज रुपन्देहीले आइतबार विरोध प्रदर्शन गरेको हो।
प्रतिनिधिसभा विघटन गर्ने प्रधानमन्त्री केपी शर्मा ओलीको निर्णय अवैधानिक, अलोकतान्त्रिक र निरंकुशता भएको भन्दै समाजले बिरोध गरेको हो ।
बुटवलको राजमार्ग चौराहमा आयोजित बिरोध प्रदर्शनमा बोल्दै मानवअधिकार तथा शान्ति समाजका केन्द्रीय बरिष्ठ उपसभापति गोबिन्द खनालले प्रधानमन्त्री ओलीको कदम असंवैधानिक भएको बताए। उनले पार्टी भित्रको बिरोधका कारण देशलाई नै बन्दी पारेको भन्दै निर्णय सच्चाउन आग्रह गरे।
खनालले प्रधानमन्त्री ओलीले सरकारमा रहेकाहरुले गरेको भ्रष्टाचारलाई थेग्न नसकेको कारण र असफलता लुकाउनका लागि लोकतन्त्रलाई दाउमा राखेको बताए ।
प्रधानमन्त्री ओलीको कदम अलोकतान्त्रिक भएको र लोकतान्त्रिक पद्धति जोगाउनका लागि नागरिक समाजले आन्दोलन गर्न पछि नपर्ने भन्दै उनले संसद बिघटन लोकतन्त्रको सबैभन्दा ठूलो उपहास भएको समेत बताए।
मानव अधिकार तथा शान्ति समाज रुपन्देहीका अध्यक्ष डिपी खनालले प्रतिनिधि सभा बिघटन असंवैधानिक, स्वेच्छाचारी भएको बताए।
अधिवक्ता महेन्द्र पाण्डेले प्रधानमन्त्री ओलीले सनकको भरमा प्रतिनिधिसभा बिघटन गरेको भन्दै सबैका लागि यो निर्णय अस्वीकार्य भएको बताए।
