प्रधानमन्त्रीसमेत रहेका नेपाली कांग्रेसका सभापति शेरबहादुर देउवाले भक्तपुर पुगेर वडा अधिवेशन शुभारम्भ गरेका छन्।
भक्तपुरका दुई नगरपालिकाभित्रका एकेक वटा वडामा पुगेर देउवाले आज वडा अधिवेशन अवलोकन पनि गरेका थिए।
मध्यपुर थिमी नगरपालिका वडा नम्बर ४ र सूर्यविनायक नगरपालिका वडा नम्बर ५ मा पुगेर वडा अधिवेशनको अवस्थाबारे देउवाले जानकारी लिएका हुन्।
कांग्रेसले आज वडा अधिवेशन गरिरहेको छ। देशैभर आज छ हजार सात सय ४३ वडामा अधिवेशन गर्ने भने पनि ५६ जिल्लामा मात्रै क्रियाशील सदस्यता सार्वजनिक गरिएको छ भने बाँकी जिल्लाको बाँकी नै छ।
सभापति देउवाले पार्टीलाई वडा तहदेखि नै बलियो बनाउने गरी जनताको मन जित्न काम गर्न पार्टीका नेता तथा कार्यकर्ताहरूलाई अनुरोध गरेको देउवाको सचिवालयले जनाएको छ।