प्रदेश-१ का मुख्यमन्त्री भीम आचार्यले कात्तिक ५ गतेमात्रै विश्वासको मत लिने प्रस्ताव गरेका छन्।
शुक्रबार दिउँसो प्रदेश सभाका सभामुख प्रदीपकुमार भण्डारीसँगको भेटमा मुख्यमन्त्री आचार्यले यस्तो प्रस्ताव राखेको स्रोतले जानकारी दियो।
आजदेखि प्रदेश सभाको हिउँदे अधिवेशन सुरू हुँदैछ। बैठक सुरू हुनुअघि मुख्यमन्त्री आचार्यले सभामुखसँग विश्वासको मत लिनेबारे छलफल गरेका हुन्।
प्रदेश-१ का प्रतिपक्षी दलहरूले भने मुख्यमन्त्री आचार्यले संविधानको आफूअनुकूल व्याख्या गर्दै सत्ताको आयु लम्ब्याउन खोजेको भन्दै उनले संविधानअनुसार पार्टी विभाजन भएको तीस दिनभित्र विश्वासको मत लिनु पर्ने बताएका छन्।
एमाले र जनता समाजवादी पार्टी एकैदिन भदौ ९ मा औपचारिक रूपमा विभाजित भएका थिए। एमाले विभाजन भएर नेकपा एकीकृत समाजवादी र जसपा विभाजित बनेर लोकतान्त्रिक समाजवादी पार्टी गठन भएका थिए। त्यो घटना क्रमपछि बागमती, प्रदेश १ र २ सरकारले विश्वासको मत लिनुपर्ने संवैधानिक बाध्यता उत्पन्न भएको थियो।
संविधानको धारा १८८ को उपधारा २ अनुसार मुख्यमन्त्रीले प्रतिनिधित्व गर्ने दल वा सरकारलाई समर्थन गर्ने दल विभाजित भए त्यसको ३० दिनभित्र संसदबाट मुख्यमन्त्रीले विश्वासको मत लिने प्रस्ताव पेश गर्ने र उपधारा ३ मा तत्काल कायम रहेको संसद्को बहुमतबाट पारित नभए मुख्यमन्त्री पदमुक्त हुने उल्लेख छ। सोहीअनुसार प्रदेश २ मा लालबाबु राउतले बुधबार नै विश्वासको मत लिइसकेका छन्।
प्रदेश-१ का विपक्षी गठबन्धनले भदौ २४ भित्र सरकारले विश्वासको मत लिइसक्नु पर्ने भन्दै प्रदेश प्रमुख सोमनाथ अधिकारी प्यासी र सभामुखलाई भनिसकेका छन्। सरकारले संविधानबाहिर जान नमिल्ने उनीहरूको तर्क छ। तर, मुख्यमन्त्रीले दसैंपछिको भाका सार्वजनिक गरेपछि विपक्षी गठबन्धन संशकित बनेको छ।
प्रदेश १ संसदमा सत्तारूढ एमालेका ४१ सांसद छन्। एक जना सभामुख र एक जना फरार सांसद घटाउँदा उसको मत संख्या ३९ मात्रै हुन्छ। यो संख्या सरकार टिकाउन पुग्दो संख्या होइन। संसदमा सामान्य बहुमत सिद्ध गर्न ४७ मत आवश्यक पर्छ। विपक्षी गठबन्धन भने ५० मत संख्या साथमा लिएर नयाँ सरकार बनाउने तयारीमा बसेको छ। आचार्य नेतृत्वको सरकारले विश्वासको मत लिने मिति पर धकेल्ने प्रयास गरिरहँदा त्यसलाई रोक्ने प्रयासमा गठबन्धन जुटेको छ। गठबन्धनमा कांग्रेसका २१, माओवादी केन्द्रका १५, नेकपा एकीकृत समाजवादीका १०, जसपाका ३ र संघीय लोकतान्त्रिक मन्चका १ गरी ५० सांसद छन्।
