सत्तारूढ दलका नेकपा (एकीकृत समाजवादी)का अध्यक्ष माधवकुमार नेपालले आउँदो चुनावमा आफूहरूलाई खिसिट्युरी गर्नेहरूको हरिबिजोग हुने बताएका छन्।
बिहीबार होलीको अवसरमा आयोजित कार्यक्रममा सम्बोधन गर्दै नेपालले आउँदो वैशाख ३० गते स्थानीय तहको निर्वाचनमा खिरिट्युरी गर्नेहरूको हरिबिजोग हुने बताएका हुन्।
‘हाम्रो खिसिट्युरी गर्ने तत्वहरूको हरिबिजोग थाहा हुनेछ। घमण्डको पोको भएकाहरूको रावणको नाश भएजस्तै, होलिका दहन भए जस्तै दहन होस्,’ उनले भने।
यस्तै आउँदो चुनावमा कलमको कमाल देखिने नेपालले बताए।
‘हाम्रो एकीकृत समाजवादी पार्टीको भविष्य उज्वल छ। जसको चिन्ह कलम हो। वैशाख ३० गतेको चुनावमा कलमको कमाल देखिनसक्नु पर्दछ,’ उनले भने, ‘सत्य र न्यायको प्रतीकको रूपमा रहेको कलमले आवश्यक कमाल गर्नेछ भन्ने आशा गर्दै कलमको प्रचार अभियानमा गाउँगाउँ, टोलटोल बस्तीबस्तीमा पुगौं।’
उनले कलमको प्रचार गर्न कार्यकर्ताहरू गाउँ टोल सम्म पुग्न आह्वान गरेका छन्। आउँदो चुनावमा सामर्थ्य शक्ति चुनावको मैदान देखिने उनले बताए।
राष्ट्रसभाको पहिलो र दोस्रो चुनावमा आफ्नो पार्टीको सामर्थ्य शक्ति देखिएको र स्थानीय तहको चुनावमा पनि देखिने उनले बताएका हुन्।
