नेपाली कांग्रेसका महामन्त्री गगन थापाले उच्च शिक्षा सञ्चालन गर्नका लागि छुट्टै ऐन बनाउनुपर्ने बताएका छन्।
आज कीर्तिपुरमा भएको त्रिवि कर्मचारी संघ केन्द्रीय समितिको १२ औं राष्ट्रिय सम्मेलनमा बोल्दै उनले नेपालको उच्च शिक्षा सञ्चालनसम्बन्धी ऐन बनाउनुपर्ने बताए।
उनले उच्च शिक्षासम्बन्धी ऐन बनाउन ढिलाइ भइसकेको पनि बताए।
‘उच्च शिक्षामा कसले कति लगानी गर्ने, विश्वविद्यालय कसरी चलाउने, नयाँ विश्वविद्यालय खोल्ने वा नखोल्ने र शिक्षाको सम्बन्धमा संघ तथा प्रदेशको जिम्मेवारी के-के हुने भन्नेमा पनि छलफल गर्नुपर्छ,’ उनले भने।
उनले नेपालको उच्च शिक्षा कता लैजाने भन्ने त्रिविले नेतृत्वदायी भूमिका खेल्नुपर्ने बताए। उनले देशमा ठूलो राजनीतिक परिवर्तन भए पनि उच्च शिक्षा कता लैजाने भन्नेमा छलफल नभएको बताए।
उनले त्रिविमा देखिएका समस्या समाधान गर्न सबै पक्ष जिम्मेवार हुनुपर्ने बताए।