नेपाली कांग्रेसका केन्द्रीय सदस्य अर्जुननरसिंह केसीले देशमा आर्थिक समस्या भइरहेका बेला सरकारले करोडौं रुपैयाँ खर्चेर हतियार किन्न लागेको विषयमा प्रश्न उठाएका छन्।
पार्टी कार्यालय सानेपामा बसेको केन्द्रीय समिति बैठकमा बिहीबार बोल्दै केसीले देशमा आर्थिक संकट चुलिँदै गएको र विदेशी मुद्रा रित्तिँदै जान थालेको वित्तीय संकटका बेला ८४ करोड रुपैयाँ बराबरको विदेशी हातहतियार किन्नुको के औचित्य छ भनी प्रश्न गरेका हुन्।
उनले पार्टीभित्रको एक पक्षलाई उपेक्षा र तिरस्कार गरेर गठबन्धनका नाममा एक पक्षीय हितको सोच र स्वार्थले आजको चुनौती सामना गर्न र मुलुक, लोकतन्त्र र कांग्रेसको समग्र हित हुन सक्दैन भन्नेबारे सचेत हुनु आवश्यक रहेको बताए।
‘गठबन्धन गन्तव्य र लक्ष्य होइन, कांग्रेसको स्वाभिमान र सम्मानजनक हैसियतको रक्षा गर्ने स्पष्टतासहित मापदण्ड र आचारसंहितामा सहित पार्टीको सस्थागत निर्णयका आधार स्पष्ट हुनुपर्छ,’ केसीले भने।
सभापति शेरबहादुर देउवाले नीति महाधिवेशन गर्न नसक्नु, विभाग गठन र भ्रातृ संस्था महाधिवेशन गर्न नसक्नु अक्षमता भएको उनले बताए।