नेकपा (एकीकृत समाजवादी) की सांसद सरलाकुमारी यादवले सरकारले ल्याएको नागरिकता विधेयकले नेपालको राष्ट्रियता सबल बनाउने बताएका छन्।
शुक्रबारको प्रतिनिधि सभा बैठकमा ‘नेपाल नागरिकता (पहिलो संशोधन) विधेयक, २०७९ माथि विचार गरियोस्’ भन्ने प्रश्ताव माथिको छलफलमा बोल्दै सांसद यादवले नागरिकता विधेयक नेपालको राष्ट्रियता सबल बनाउने पक्षमा रहेको बताएकी हुन्। उनले नागरिकताको विषयमा राजनीति नगर्न सांसदहरूलाई आग्रहसमेत गरिन्।
‘संविधानमा नागरिकता सम्बन्धी व्यवस्थामा संघीय कानून बमोजिम हुने भनिएकाले यस संसदसमक्ष यो विधेयक पेस भएको हो। यो नेपाली जनता र नेपालको राष्ट्रियता सबल बनाउने पक्षमा छ। यसमा राजनीति नगरौं भन्ने मेरो अनुरोध छ’, उनले भनिन्, ‘यस विधेयकमा रहेका मुख्य विषय र प्रशंसनीय कानूनी व्यवस्था भनेको २०७२ असोज ३ अघि जन्मसिद्ध नेपाली नागरिकले प्राप्त गर्नेगरी विधेयक ल्याएको छ।’
उनले नेपाली पुरूषसँग विवाह गरेकी विदेशी महिलालाई कुनै शर्त नराखी अंगिकृत नागरिकता दिने व्यवस्था गरिनु प्रशंसनीय भएको बताइन्।
‘नेपालको नागरिक आमाबाट नेपालमा जन्म भइ यहीँ बसोवास गरेको र बाबुको पहिचान हुन नसकेको व्यक्तिले पनि वंशजको आधारमा नेपालको नागरिकता प्रदान गर्ने व्यवस्था पारित गरिएको छ’, उनले भनिन्, ‘राज्य व्यवस्था समितिले विवाह गरेको ७ वर्षपछि मात्रै नागरिकता दिनुपर्ने व्यवस्था पारित गर्ने विषय महिला माथि विभेद गरेको थियो। नेपाली पुरूषसँग विवाह गरेकी विदेशी महिलालाई पनि कुनै शर्त नराखी अगिंकृत नागरिकता दिने व्यवस्था प्रस्ताव गरिएको छ।’
सांसद यादवले कानून कार्यान्वयन गर्ने अधिकारीले गर्ने व्यवहार महिलामैत्री नभएको भन्दै आगामी दिनमा यस्तो नहुने व्यवस्था गर्न गृहमन्त्रीको ध्यानाकर्षण गराइन्। उनले विधेयक सर्वसम्मत पारित हुने विश्वास व्यक्त गरिन्।
