सभामुख अग्निप्रसाद सापकोटाले त्रिभुवन विश्वविद्यालयमा देखा परेका समस्या समाधान गर्न सरकारलाई रूलिङ गरेका छन्।
त्रिविमा गत असारदेखि नेविसंघले तालाबन्दी गरेको छ। आइतबार उक्त ताला अनेरास्ववियुले फुटाए पनि नेविसंघले पुन: ताला लगाएको थियो।
यसबारे आज प्रतिनिधि सभा बैठकमा प्रमुख प्रतिपक्षी दल नेकपा एमालेका सांसदहरूले प्रश्न उठाएका थिए। सांसद प्रदीप ज्ञवालीले सरकार संरक्षितहरूबाटै त्रिविमा अवरोध भइरहेको बताएका थिए।
प्राध्यापक आक्रमण गर्ने र तीन वर्षमा तीन सय दिन तालाबन्दी गर्ने नेविसंघ कार्यकर्तालाई सरकारले संरक्षित गरेको उनको आरोप थियो।
सभामुख सापकोटाले त्रिविमा पठनपाठनलगायत कार्य प्रभावित हुन गएको कुरा सांसदहरूले उठान गरेकोले सभाको गम्भीर ध्यानाकर्षण भएको बताएका थिए।
‘त्रिभुवन विश्वविद्यालयमा भएको तालाबन्दी लगायतका विरोध कार्यक्रमले विश्वविद्यायका शैक्षिक एवं पठनपाठन कार्य प्रभावित हुन गएको भन्ने विषयमा माननीय सदस्यले कुरा उठाउनु भएको छ। सभाको गम्भीर ध्यानाकर्षण भएको छ। तसर्थ यो समस्या शीघ्र समाधान गर्न नेपाल सरकारलाई निर्देश गर्दछु,’ सभामुख सापकोटाले भने।
त्रिविमा हुबहु प्रश्नपत्र दोहोरिएकोबारे गठित छानबिन समितिको प्रतिवेदन सार्वजनिक गरिनुपर्नेजस्ता माग राखेर नेविसंघले आन्दोलन गरिरहेको छ। साथै नेविसंघले उपकुलपतिसहित पदाधिकारीको बर्खास्ती हुनुपर्ने माग राखेको छ।