नेकपा एमालेले दाङका तीन निर्वाचन क्षेत्रमा प्रत्यक्षतर्फ प्रतिनिधिसभा सदस्यका लागि उम्मेदवारको नाम सिफारिस गरेको छ।
दाङ क्षेत्र नं. २ बाट एमाले महासचिव शंकर पोखरेलको नाम मात्रै सिफारिस गरिएको जिल्ला सचिव मनोहर बुढाथोकीले सेतोपाटीलाई जानकारी दिए।
२०७४ सालको निर्वाचनमा प्रदेश सभामा निर्वाचित भएका पोखरेल लुम्बिनी प्रदेशको मुख्यमन्त्री बनेका थिए। उनी निर्वाचन क्षेत्र नं. २ (क) बाट निर्वाचित भएका थिए।
त्यतिखेर नेकपा माओवादी केन्द्रका नेता कृष्णबहादुर महरा निर्वाचन क्षेत्र नं. २ बाट प्रतिनिधिसभा सदस्यमा निर्वाचित भएका थिए।
२०७४ सालमा एमाले र माओवादीबिचमा चुनावी गठबन्धन भएको थियो। उनीहरू एउटै र साझा घोषणा पत्रका साथ निर्वाचनमा गएका थिए।
महासचिव पोखरेल उम्मेदवार बनेको क्षेत्रबाट यसअघि नै प्रदेश सभा २ (क) मा बलिभद्रा रानाको नाम एमालेले एकल रूपमा सिफारिस गरिसकेको छ। उनी यसअघि लुम्बिनी प्रदेश निर्माण ब्यवसायी संघका अध्यक्ष थिए।
राना राप्रपाबाट घोराहीका पूर्व मेयरसमेत भएका ब्यक्ति हुन्। कुनै दिन उनी नेपाली कांग्रेसका नेता स्वर्गीय खुमबहादुर खड्काको प्रभावका कारण नेपाली कांग्रेस पनि बनेका थिए।
त्यस्तै एमालेले दाङको निर्वाचन क्षेत्र नं. ३ बाट तीन जनाको नाम प्रतिनिधिसभा सदस्य पदका लागि सिफारिस गरेको छ।
एमाले उपाध्यक्ष युवराज ज्ञवालीको नाम एक नम्बरमा सिफारिस गरिएको छ भने तुलसीपुर उपमहानगरपालिकाका यसअघिका मेयर तथा केन्द्रीय सदस्य घनश्याम पाण्डे र केन्द्रीय सदस्य कोमल वलीको नाम दोस्रो र तेस्रो नम्बरमा सिफारिस भएको जिल्ला सचिव मनोहर बुढाथोकीले जानकारी दिए।
त्यस्तै निर्वाचन क्षेत्र नं. १ मा पनि प्रतिनिधिसभा सदस्य पदका लागि तीन जनाको नाम सिफारिस भएको छ। सचिव बुढाथोकीका अनुसार एक नम्बरमा नेतृ शान्ता चौधरी, दुई नम्बरमा गंगा चौधरी र तीन नम्बरमा रेवतीरमण शर्माको नाम सिफारिस गरिएको छ।
जिल्ला सचिव बुढाथोकीका अनुसार निर्वाचन क्षेत्र नं. २ (ख) र निर्वाचन क्षेत्र नं. ३ (क) मा छलफल जारी रहेको बताए। त्यस्तै निर्वाचन क्षेत्र नं. १ अन्तर्गत पनि प्रदेशसभा सदस्यका लागि छलफल टुंगोमा पुग्नै लागेको उनले जानकारी दिए।
