नेकपा (एमाले) का नेता घनश्याम भुसालले आगामी प्रदेशसभा र प्रतिनिधिसभा निर्वाचन अघि नै वाममोर्चा बनाउन नसक्नु मुलुकका लागि ठूलो दूर्भाग्य भएको टिप्पणी गरेका छन्।
कम्युनिष्टबीच मोर्चाबन्दी गरेर अघि नबढ्ने हो भने आगामी ३-४ वर्ष भित्रै मुलुकमा ठूलो राजनीतिक उथुलपुथल हुने र त्यसबाट कम्युनिष्टहरुले ठूलो मूल्य चुकाउनुपर्ने उनको चेतावनी समेत थियो।
‘अस्ती संसद विघटन भए पनि नेपालको राजनीतिमा कमरेड प्रचण्डलाई मैले यो सम्झिनुसहै भन्न खोजेको हो। यो सुरू भएको छ है, राजनीतिप्रति वितृष्णा, सत्ताका प्रति वितृष्णा। राज्यको प्रतिको घृणा। यो चानेचुने कुरा छैन’, उनले भने, ‘यो २/४ वटा स्वतन्त्र आएमात्रै नभन्नुस्। स्वयम् राजनीतिक पार्टीहरु भित्र आज यो उकुसमुकुस जुन छ, यो कुरालाई कसैले नजर अन्दाज नगरौं। म आगामी ३-४ वर्ष भित्रमा एउटा ठूलो उथलपुथल देख्छु यो क्षितिजमा।’
आईतबार काठमाडौंमा आयोजित ‘समाजवादको नेपाली मार्गचित्र’ विषयक विचार गोष्ठीमा बोल्दै नेता भुसालले अहिले देखा परेको राजनीतिप्रतिको वितृष्णा, सत्ताप्रतिको वितृष्णा र दलहरुभित्रै रहेको उकुसमुकसलाई नजरअन्दाज नगर्न पनि राजनीतिक नेतृत्वलाई सचेत गराए।
‘त्यसले कम्तिमा आजको राजनीतिको नीतिहिनता, विचारहिनता, मनपरीतन्त्र कम्तिमा यति चाँही लैजान्छ। त्यो चाँही राम्रै हुनेछ। तर, राजनीतिले त्यो भन्दा धेरै कुरा हामीबाट लिन्छ’, उनले भने, ‘आज बाँचेका, हामी राजनीति गरेका, सत्तामा रहेकाहरुले यसको जवाफ दिनुपर्ने हुनेछ। हामीसँग राजनीतिले ठूलो मूल्य लिँदैछ।’
मुलुकलाई राजनीतिक संकटबाट रोक्ने हो भने बामपन्थीबीच एकता गरेर अघि बढ्नुपर्ने उनले दोहोर्याए। नेता भुसालले तत्कालीन नेकपालाई फुटाएर प्रचण्डलगायतका नेताहरुले दुुनियाँसामू नेपालको बेइज्जत गरेको जिकीर समेत गरे।
उनले मञ्चमा रहेका प्रचण्डलाई क्रमभंग गरेर भए पनि कम्युनिष्टबीच एकता गर्न ढिलाई नगर्न आग्रह गरे।
‘कमरेड प्रचण्ड र अरु नेताहरु, हामी सबै यसलाई कसरी रोक्ने हो। यदि हामीले त्यो एकता नभत्काएको भए संसद विघटन गरेर यो दुनियाँका अगाडि बेइज्जति नगरेको भए यस्ता संकट थाम्ने नेपाली राजनीति बनेको थियो। अर्थनीति बन्दै थियो। यो चुनाव भन्दा अगाडि नै हामीले बाममोर्चा बनाउन सक्नुपथ्र्यो’, उनले भने, ‘दूर्भाग्य हो। ठूलो दूर्भाग्य हो। मैले पटक पटक भनेको छु–पहिलो ठूलो दूर्भाग्य, पहिलो ठूलो पार्टी कम्युनिष्ट, तेस्रो ठूलो पार्टी कम्युनिष्ट, चौंथो , पाँचौं, सातौं, आठौं सबै कम्युनिष्ट। आज हालत के भईराखेको छ? कारण धेरै छन्।’
उनले अगाडि भने, ‘बाहिरबाट हेर्दा त मान्छेहरुले के देख्ने भो भने समाजवाद ल्याउन के गर्नु पर्दो रहेछ भने भएकै संसद विघटन गर्नु पर्दोरहेछ। पार्टी फुटाउन पर्दोरहेछ। बाहिर बसेकोहरुले के । यो सारा बेईज्जति काम गर्नु पर्दोरहेछ। कमरेड प्रचण्ड, पटक पटक तपाईले भन्नु भएको छ क्रमभंगता, अब यो क्रमभंगता फेरि जरूरी भयो मुलुकमा चाँही। मुलुकमा ठूलो राजनीतिक उथलपुथल देख्छु मुलुकमा। त्यसलाई कमजोर नआँक्न आग्रह गर्दछ। यो नीतिहीनता, विचार हिनता, मनपरी तन्त्र कम्तिमा यो चाँही लैजान्छ र त्यो राम्रै हुन्छ। ’
नेता भुसालले संसद विघटन गरेर सुरु भएको नेपालको राजनीतिक संकट नेताहरु नमिल्ने हो भने झन गहिरिएर जाने समेत बताउनु भयो ।
