नेकपा माओवादी केन्द्रका अध्यक्ष पुष्पकमल दाहाल प्रचण्ड गोरखा क्षेत्र नम्बर २ बाट उम्मेदवार छन्।
प्रचण्ड माओवादीबाट मात्र होइन नेपाली कांग्रेससहित सत्ता गठबन्धनकै साझा उम्मेदवार हुन्।
बाबुराम भट्टराईले छाडेको गोरखा २ मा उम्मेदवार हुन प्रचण्ड आएपछि यहाँको चुनावी माहौल नै बदलिएको छ।
वैशाखमा भएको स्थानीय चुनावमा कांग्रेस र माओवादी गोरखामा प्रतिस्पर्धामा उत्रिएका थिए। ११ मध्ये ९ पालिका प्रमुख माओवादीले जितेको थियो।
तर पाँच महिनामै परिस्थिति बदलियो। यहाँ कांग्रेस र माओवादी प्रतिस्पर्धा छाडेर सहयात्रामा लागेका छन्।
माओवादीले धेरै पालिका जितेर प्रशंसा बटुलेको गोरखालाई नै प्रचण्डले सुरक्षित क्षेत्र ठाने र यहीबाट असोज २३ मा उम्मेदवारी दर्ता गरेका थिए।
२०७४ मा नारायणकाजी श्रेष्ठलाई हराएका भट्टराई यसपालि चुनाव नै उठेनन्। आफूनिकट नेता फणिन्द्र देवकोटालाई माओवादीकै चुनाव चिन्हबाट लड्ने गरी प्रदेश सभा क्षेत्र (क) मा टिकट दिलाए।
प्रदेश सभा क्षेत्र (ख) मा भने कांग्रेस केन्द्रीय सदस्य सुरेन्द्र पाण्डे उम्मेदवार छन्।
२०७४ मा यो क्षेत्र कांग्रेसकै प्रकाशचन्द्र दवाडी निर्वाचित भएका थिए। सत्ता गठबन्धनमा सुरूमा यो प्रदेश सभा क्षेत्र माओवादीलाई दिने सहमति हुँदा दवाडीले स्वतन्त्र उम्मेदवारी घोषणा गरेका थिए।
तर गठबन्धनभित्र कांग्रेसलाई नै उक्त क्षेत्र दिने सहमतिपछि पाण्डे उक्त क्षेत्रबाट उम्मेदवार भएका छन् भने दवाडीले उम्मेदवारी दर्ता गरेनन्।
राष्ट्रिय सभामा प्रमुख प्रतिपक्षी दलका नेतासमेत भइसकेका कांग्रेस केन्द्रीय सदस्य पाण्डे सभापति शेरबहादुर देउवा निकट छन्। राष्ट्रिय सभा सांसद भएका उनी प्रदेश सभामा उम्मेदवार हुनुलाई गण्डकीको भावी मुख्यमन्त्रीका रूपमा समेत चर्चा गर्न थालिएको छ।
बाबुराम भट्टराईको पकड भएको मानिएको पालुङटार क्षेत्रमा उनीनिकट फणिन्द्र देवकोटा र अर्को क्षेत्रमा कांग्रेसका पाण्डेलाई उम्मेदवार बनाएपछि प्रचण्डलाई झन् चुनाव जित्न सहज भएको छ।
गत वैशाखमा भएको स्थानीय चुनावको मत हेर्दा क्षेत्र नम्बर २ मा पर्ने पालिकाभित्रका वडाहरूमा नेकपा माओवादी केन्द्र अगाडि देखिन्छ।
माओवादीका वडाध्यक्ष उम्मेदवारहरूले २२ हजार दुई सय ५० मत ल्याएका थिए भने कांग्रेस उम्मेदवारले २१ हजार एक सय ३६ मत पाएका छन्। यहाँ नेकपा एमालेका उम्मेदवारले ७ हजार ९ सय २६ र जसपा (बाबुराम भट्टराई पक्ष) ले ७ हजार ५ सय ४ मत ल्याएका थिए।
अहिले कांग्रेस-माओवादी र बाबुराम भट्टराई एकै गठबन्धनमा छन्। यसो हुँदा गोरखा २ मा ५० हजार ८ सय ९० मत हुन आउँछ। भने एमालेको मत सात हजार पाँच सय ४ मात्रै हुन्छ। एमालेले गोरखामा कसैसँग तालमेल गरेको छैन।
गोरखा क्षेत्र नम्बर २ प्रतिनिधि सभामा नेकपा एमालेबाट २९ वर्षीय अब्दुस सलाम मियाँ उम्मेदवार छन्। उनी सिरानचोक ३ का हुन्। मियाँ विवेकशील साझा पार्टीको केन्द्रीय सदस्य तथा युवा संगठन अध्यक्ष छाडेर काठमाडौं ६ मा स्वतन्त्र उम्मेदवारी दिने घोषणा गरेका थिए। तर उनी एमाले प्रवेश गर्दै गोरखा २ बाट टिकट पाएका हुन्।
गोरखा २ मै ९९ वर्षका टीकादत्त पोखरेल पनि उम्मेदवार छन्। उनी नेपाली कांग्रेस (बिपी) बाट उम्मेदवार भएका हुन्। ६६ वर्षका प्रचण्डको प्रतिस्पर्धा भने २९ वर्षका मियाँसँग नै हुने देखिन्छ। तर यहाँ एमालेको मत सत्ता गठबन्धनकोभन्दा निकै कम छ।
मियाँ र पोखरेल भने एकै गाउँपालिका सिरानचोकका हुन्। मियाँ वडा नम्बर ३ र पोखरेल वडा नम्बर ४ माझगाउँवेशीका हुन्। पोखरेल तीन वर्षअघि मात्रै कांग्रेस छाडेर कांग्रेस बिपीमा आवद्ध भएका थिए। उनी गोरखाका पुराना कांग्रेस कार्यकर्ता थिए। सेनाका जागिर छाडेर कांग्रेसको मुक्ति सेनामा आफूले काम गरेको र पटकपटक गरी ६ वर्ष जेल बसेका थिए। जनताले चाहेजस्तो परिवर्तन नआएकोले आफूले उम्मेदवारी दिएको उनको भनाइ छ।
गोरखा २ मा राप्रपाबाट ४८ वर्षका सुशील पन्त, नेमकिपाबाट प्रल्हाद लामिछाने, हाम्रो नेपाली पार्टीबाट प्रकाश थापा, राप्रपा नेपालबाट कुलबहादुर बस्नेत, राष्ट्रिय स्वतन्त्र पार्टीबाट कविन्द्र बुर्लाकोटी, स्वतन्त्र उम्मेदवार गणेश देवकोटा र विनोदकुमार गुरूङ उम्मेदवार छन्। यी उम्मेदवारहरूमध्ये सत्ता गठबन्धनका प्रचण्ड नै हाबी हुने देखिन्छ।
गोरखा १ मा भने मुख्यरूपमा कांग्रेसका राजेन्द्र बजगाईं र नेकपा एमालेका रामशरण बस्नेतबीच चुनावी प्रतिस्पर्धा हुँदैछ। २०७४ मा प्रदेश सभा क्षेत्र (ख) मा बजगाईं र बस्नेतबीच प्रतिस्पर्धा हुँदा बस्नेतले चुनाव जितेका थिए। त्यसबेला माओवादी-एमालेबीच वामगठबन्धन भएको थियो।